Тошкент шаҳрининг Олмазор туманидаги 15-мактаб ёнидаги пиёдалар ўтиш йўлига замонавий светофор ўрнатилди. Бу ҳақда «Ўзбекистон 24» телеканалининг «Факт 24» дастурида маълум қилинди.
Маълум қилинишича, пиёда ўтиш йўлагига келиши билан сенсор мослама ишга тушади ва автомобиллар учун қизил чироқ ёнади.
«Тошкентдаги айрим тартибга солинган ўтиш жойларида светофорлар тугмалар орқали тартибга солинади. Ушбу тугмалар аксарият ҳолларда бузилган ёки доимий яшил ёниши учун скотч билан бойлаб қўйилган. Мазкур ҳолатда эса ўтиш жараёнида сенсорлар ишга тушади ва тегишли светофор ҳамда LED-чироқлар ёнади», — дейди Тошкент шаҳар ИИББ ЙҲХБ бошлиғи ўринбосари Азиз Садиров.
Таъкидланишича, пиёдалар ўтиш йўл белгилари ҳам LED-чироқлари ёрдамида ёритилган бўлиб, у қуёш панелларидан қувватланади. «Кун бўйи қуёшдан энергия олган светофор тун бўйи ишлаши учун етарли», — дейилади хабарда.
Келгусида мазкур лойиҳани аҳоли гавжум жойларда қўллаш режалаштирилган.
Эслатиб ўтамиз, 2020 йилнинг августида Хоразмда кўчма тартибда олиб юришга мўлжалланган инновацион светофор жорий қилинганди.
Изоҳ (0)