Ijtimoiy tarmoqlarda “soqol” deb nomlangan tadbir haqida so‘z borib, unda soqolli fuqarolarni aniqlash, so‘ngra ularni soqol olishdan oldin va keyin suratga olish kerakligi aytilgan audioyozuv tarqaldi.
“Hurmatli xodimlar, ‘soqol’ tadbiri bo‘yicha ham tezlashtirib qilib beraylik. ‘Gorotdel’dan so‘rayapti, Ichki ishlar vazirligidan kelgan mehmonlar nazoratga olgan. Har bitta ‘GOM’ (shahar militsiya bo‘limi)ga 20 tadan soqollilarni (fuqarolarni) aniqlab, soqoli bilan rasmga olib, keyin soqoli oldirilgani holatini ham rasmga olib, oldiga ma’lumotini yozasizlar: qayerda yashaydi, nechanchi yil, kim u. Xuddi shunday qilib, tezlashtirib qilib berishimiz kerak. Har bitta ‘GOM’ga 20 tadan berilgan, bizda bitta ham hali bo‘lgani yo‘q. Kechqurun so‘rov bo‘ladi, e’tiroz bo‘lyapti, bo‘la qolinglar tezroq!” — deydi audioyozuvda buyruq berayotgan shaxs.
Ichki ishlar vazirligi matbuot kotibi Shohrux G‘iyosov vaziyat yuzasidan “Gazeta.uz”ga izoh berdi.
“Ichki ishlar organlarida bunday nomlanadigan tadbir umuman yo‘q. Soqol qo‘yish-qo‘ymaslik har bir fuqaroning o‘ziga, e’tiqodiga bog‘liq. Bunga aralashishga hech kimning haqqi yo‘q”, — dedi u.
Matbuot kotibi mazkur ovoz kimga tegishli ekanligini IIV o‘rganib chiqishini ma’lum qildi.
2019-yil avgust oyida Toshkentdagi “Malika” savdo markazida o‘tkazilgan reydda soqol qo‘ygan kishilar Shayxontohur tumani 4-sonli ichki ishlar bo‘limiga olib borilib, majburiy ravishda soqoli olingan edi. Toshkent shahar ichki ishlar boshqarmasi soqol olishga majbur qilinganligini inkor etgan. Keyinroq esa bu ishni qilganlar jazolangani haqida ma’lum qilingan.
Avvalroq Navoiyda haydovchining soqol qo‘yganiga e’tiroz bildirgan YPX xodimi ustidan xizmat tekshiruvi o‘tkazilgani hamda Toshkentda hijobli ayollar ushlanib, so‘roq qilinayotgani haqidagi videoga rasmiy munosabat bildirilgani haqida xabar berilgandi.
Izoh (0)