Шавкат Мирзиёев 13 май куни Қирғизистон президенти Садир Жапаров билан телефон орқали мулоқот қилди.
Президент матбуот хизматининг хабар беришича, давлат раҳбарлари Рамазон ҳайити муносабати билан бир-бирларини самимий қутлаб, биродар халқларга тинчлик, фаровонлик ва равнақ тилаб, эзгу истакларини билдирди.
Қирғизистон президентининг 2021 йил март ойидаги Ўзбекистонга давлат ташрифи давомида эришилган келишувлар ва имзоланган битимларни ўз вақтида амалга ошириш муҳим экани қайд этилди. Шавкат Мирзиёев ва Садир Жапаров ўртасида 30 апрель куни бўлиб ўтган телефон орқали мулоқотда ҳам март ойида «Тошкентда қабул қилинган мажбуриятларни сўзсиз бажариш муҳим»лиги қайд этилганди. Давлат раҳбарлари, шунингдек, Тожикистон чегарасидаги вазиятни тез фурсатда ҳал этишни ҳам муҳокама қилганди.
13 май куни бўлиб ўтган суҳбат давомида савдо, саноат, энергетика, транспорт ва иқтисодиётнинг бошқа тармоқларида қўшма дастур ва лойиҳаларни илгари суришга ҳам алоҳида эътибор қаратилган. Қирғизистон-Тожикистон чегарасидаги вазиятни барқарорлаштириш, шунингдек, Марказий Осиё минтақасида дўстлик, яхши қўшничилик ва шериклик муносабатларини мустаҳкамлаш бўйича олиб борилаётган ишлар мамнуният билан қайд этилган.
Бундан аввал Шавкат Мирзиёев ва Ражаб Тоййиб Эрдўғон бир-бирини Рамазон ҳайити билан табриклагани, Япония бош вазири Ёсихиде Суга билан телефон орқали мулоқот қилиб, уни Ўзбекистонга таклиф қилгани ҳамда Қозон шаҳридаги мактабда содир бўлган фожиали воқеа муносабати билан Шавкат Мирзиёев Владимир Путинга ҳамдардлик билдиргани ҳақида хабар берилганди.
Изоҳ (0)