Gonkong politsiyasi 30 yoshli sherigi bilan Promise moliyaviy kompaniyasi xodimlariga tahdid qilib, 200 million Gonkong dollarini (25,7 million AQSh dollari) talab qilgan 27 yoshli erkakni qo‘lga oldi, deb xabar beradi Esquire.
Politsiya ma’lumotlariga ko‘ra, Promise xodimlari ularga o‘yinchoq pistolet orqali tahdid qilishayotganini bir zumda tushunib yetgan, chunki u yarim shaffof ko‘k plastikdan ishlangan. Qisqa suhbatdan keyin jinoyatchilar qochib ketgan.
Biroq oradan biroz vaqt o‘tgach ulardan biri qaytib kelgandi. “U stol ustidan sakrab o‘tib, xodimlardan biriga ruchka bilan tahdid qilgan va politsiyani chaqirishni buyurgan”, — deydi manba. Shundan so‘ng, u qo‘lga olingan.
Politsiya vakillarining ma’lum qilishicha, hujum oqibatida hech kimga jarohat yetmagan, binodan biror narsa o‘g‘irlab ketilmagan. Gumonlanuvchining ruhiy kasalligi bo‘lmasada uni psixologik ekspertiza uchun shifoxonaga yuborishlari mumkin.
Avvalroq Chilida haydovchi yonilg‘i quyish pistoleti yordamida o‘g‘rilar hujumidan qutulib qolgani to‘g‘risida xabar berilgandi.
Izoh (0)