Moskvada hazillashib biznes-klassdagi taksini minib qochgan uch nafar bloger jinoiy javobgarlikka tortiladi

Moskvada blogerlar haydovchining holatini videoga olish maqsadida taksi xizmatiga tegishli BMW 7-Series’ni minib qochdi, deb yozadi CARakoom. Haydovchining bu boradagi harakati rostdan ham kutilmagan bo‘ldi: erkak mashina o‘g‘rilari ustidan politsiyaga ariza yozgan va endilikda ular jinoiy javobgarlikka tortiladi.

Rossiya IIV matbuot xizmatining ma’lum qilishicha, uch nafar yigit Presnya daryosi bo‘yida joylashgan ko‘chaga biznes-klassdagi taksini chaqirgan. Buyurtmaga BMW 7-Series yetib kelgan — politsiyaning aniqlik kiritishicha, mashina 3,5 million rubldan (46 ming dollar) qimmatroq turadi. Yigitlarning ikki nafari salonga darhol o‘tirgan va haydovchidan sumkani yukxonaga joylashda yordam berishini so‘ragan. Haydovchi chiqishi bilan yigitlardan biri rulga o‘tirib, mashinani boshqarib ketgan.

Oradan bir necha daqiqa o‘tgach, yigitlar qaytib kelib, haydovchiga shunchaki hazillashganini aytishgan. Blogerlar shu orqali qiziqarli video olmoqchi bo‘lgan. Biroq jabrlanuvchi hazilni tushunmagan va politsiyaga ariza yozgan.

Yigitlarning uchalasi ham shu kunning o‘zidayoq qo‘lga olingan, “hazilkash”lardan biri hibsga, qolganlari uy qamog‘iga joylashtirilgan. Blogerlarga nisbatan Rossiya Jinoyat kodeksining “O‘g‘irlik maqsadisiz avtoulovni yoki boshqa transport vositasini noqonuniy olib qo‘yish” moddasi bilan jinoyat ishi qo‘zg‘atilgan. Ushbu modda bo‘yicha maksimal jazo — yetti yilgacha ozodlikdan mahrum etish.