Vazirlar Mahkamasining 30-aprel 261-son qaroriga ko‘ra, Davlat aktivlarini boshqarish agentligiga qarashli professional futbol klublarning ustav kapitalidagi davlat ulushlari davlat organlari va xo‘jalik jamiyatlariga o‘tkazilishi belgilandi.
Prezident Shavkat Mirziyoyevning 2019-yil dekabrda “O‘zbekistonda futbolni rivojlantirishni mutlaqo yangi bosqichga olib chiqish chora tadbirlari to‘g‘risida”gi farmoniga ko‘ra, 2030-yilga qadar xususiylashtirish maqsadida davlat ulushiga ega barcha klublarni Davlat aktivlarini boshqarish agentligiga o‘tkazish belgilangandi.
Vazirlar Mahkamasining qarori ilovasida davlat ulushiga ega klublarga egalik qiladigan davlat organlari va xo‘jalik jamiyatlari, shuningdek, homiylar ro‘yxati taqdim etildi.
Qarorga ko‘ra, Toshkentning “Paxtakor” va “Bunyodkor” klublari Toshkent shahar hokimligi tasarrufiga o‘tkazildi.
Avvalroq “Paxtakor”ni 2017—2020-yillar mobaynida ta’minlab kelgan SFI Management Group klubdagi aksiyalaridan voz kechgani va klub Toshkent shahar hokimligiga o‘tgani ma’lum bo‘lgandi.
Ma’lumot uchun, 2020-yildan klublardagi davlat ulushlari Davlat aktivlarini boshqarish agentligiga o‘tkazib berilishi boshlandi. Biroq bu amaliyot OFK qoidalariga zidligi va bu kelajakda O‘zbekiston klublarining xalqaro maydondagi ishtirokiga salbiy ta’sir o‘tkazishi mumkinligi aytilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)