Вазирлар Маҳкамасининг 30 апрель 261-сон қарорига кўра, Давлат активларини бошқариш агентлигига қарашли профессионал футбол клубларнинг устав капиталидаги давлат улушлари давлат органлари ва хўжалик жамиятларига ўтказилиши белгиланди.
Президент Шавкат Мирзиёевнинг 2019 йил декабрда «Ўзбекистонда футболни ривожлантиришни мутлақо янги босқичга олиб чиқиш чора тадбирлари тўғрисида»ги фармонига кўра, 2030 йилга қадар хусусийлаштириш мақсадида давлат улушига эга барча клубларни Давлат активларини бошқариш агентлигига ўтказиш белгиланганди.
Вазирлар Маҳкамасининг қарори иловасида давлат улушига эга клубларга эгалик қиладиган давлат органлари ва хўжалик жамиятлари, шунингдек, ҳомийлар рўйхати тақдим этилди.
Қарорга кўра, Тошкентнинг «Пахтакор» ва «Бунёдкор» клублари Тошкент шаҳар ҳокимлиги тасарруфига ўтказилди.
Аввалроқ «Пахтакор»ни 2017—2020 йиллар мобайнида таъминлаб келган SFI Management Group клубдаги акцияларидан воз кечгани ва клуб Тошкент шаҳар ҳокимлигига ўтгани маълум бўлганди.
Маълумот учун, 2020 йилдан клублардаги давлат улушлари Давлат активларини бошқариш агентлигига ўтказиб берилиши бошланди. Бироқ бу амалиёт ОФК қоидаларига зидлиги ва бу келажакда Ўзбекистон клубларининг халқаро майдондаги иштирокига салбий таъсир ўтказиши мумкинлиги айтилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)