Futbol bo‘yicha Italiya A Seriyasi 36-turi doirasida “Napoli” jamoasi 11-may, seshanba kuni o‘z uyida “Udineze”ni qabul qildi.
Uchrashuvda hisob 28-daqiqada mezbonlar yarim himoyachisi Pyotr Zelinski tomonidan ochildi. 31-daqiqada Fabian Ruis o‘zining o‘ta kuchli zarbasi orqali mezbonlarning hisobdagi ustunligini oshirdi. Birinchi bo‘lim yakuniga 4 daqiqa qolganda mehmonlar hisobni qisqartirishga erishdi. Gol muallifi — Okaka Chuka. 56-daqiqaga kelib Irving Losano “Napoli”ning o‘yindagi uchinchi golin urgan bo‘lsa, oradan 10 daqiqa o‘tib himoyachi Jovanni di Lorenso ham o‘z nomiga gol yozdirib qo‘yishga erishdi. O‘yinga yakuniy nuqtani 90+1-daqiqada neapolliklar sardori Lorenso Insinye qo‘ydi. U jarima maydonchasiga kirmasdan to‘pga zarba berdi va “Udineze” posbonini ojiz qoldirdi.
Ushbu g‘alabadan so‘ng Jennaro Gattuzo shogirdlari ochkolari sonini 73 taga yetkazib, A Seriya musobaqa jadvaliga “Atalanta”ni (72 ochko) ortda qoldirgan holda 2-o‘ringa ko‘tarilib oldi. “Udineze” esa 40 ochkosi bilan 12-o‘rinni band etgan.
A Seriya
36-tur bahsi
11-may, seshanba
“Napoli” – “Udineze” 5:1
Gollar: 1:0 – 28 Zelinski, 2:0 – 31 Fabian Ruis, 2:1 – 41 Okaka Chuka, 3:1 – 56 Losano, 4:1 – 66 Di Lorenso, 5:1 – 90 Insinye.
“Napoli” – Meret, Manolas, Rraxmani, Hyusay (Mariu Ruy, 84), Di Lorenso, Bakayoko (Demme, 84), Fabian Ruis, Losano (Politano, 76), Zelinski (Elmaz, 76), Insinye, Osimhen (Mertens, 70).
“Udineze” – Musso, Molina, Bonifatsi, Larsen, Zegelar (Samir, 76), de Paul, Makengo (Palumbo, 86), Pereyra, Uolas (Foresteri, 54), Rodrigo Bekao (Auveyan, 54), Okaka Chuka (Michin, 76).
Ogohlantirish: Bonifatsi (54).
Izoh (0)