«АСКУЭ тизимини 1 августгача 100 фоиз ишга тушириш зарур» — Шавкат Мирзиёев

Президент Шавкат Мирзиёев энергетика тармоғи раҳбарларига электр энергия таъминоти бўйича белгиланган талабни бажариш лозимлигини уқтирди. Бу ҳақда давлат раҳбари раислигида 12 май куни ўтказилган видеоселектор йиғилишида айтиб ўтилди, дея хабар бермоқда «Дарё» мухбири.

Айни пайтда Президент Шавкат Мирзиёев раислигида ўтказилаётган йиғилишда давлат раҳбари бош вазир ўринбосарлари, вазирлар, вилоят, туман ва шаҳар ҳокимлари, тармоқ ва банк раҳбарлари май—июнь ойларида йўл қўйилган қолоқликларни бартараф этиш учун қайси йўналишларда ишларни ташкил этиши зарурлигини қайд этди.

Шавкат Мирзиёевнинг таъкидлашича, иқтисодий ўсиш учун, «энг аввало, асосий энергоресурслар ишлаб чиқариш ҳажмларини ошириш лозим». Қайд этилишича, биринчи чоракда табиий газ қазиб чиқариш 1,7 фоизга камайгани таъсирида 600 минг тонна цемент, 55 минг тонна минерал ўғит, 330 миллион киловатт соат электр энергияси ишлаб чиқариш ҳажмлари таъминланмаган.

«Султонов [энергетика вазири Алишер Cултонов — таҳ.] М.Абдуллаев иккинчи чоракда биринчи чоракдаги қолоқликни бартараф қилиб, 9 миллиард куб метр табиий ҳамда 165 минг тонна суюлтирилган газ ишлаб чиқаришни сўзсиз таъминласин. Султанов, Ш.Ходжаев ‘Иссиқлик электр станциялари’, ‘Ўзбекгидроэнерго’ билан бирга, саноат тармоқлари, тадбиркорлик субъектлари ва аҳоли эҳтиёжларини тўла қондириш учун иккинчи чоракда жами 15,5 миллиард киловатт электр ишлаб чиқариши зарур.

Бундан ташқари, Султонов, Мустафоев вилоят ҳокимлари билан бирга, 2021 йил 1 августга қадар, мавжуд кечикишни тўлиқ бартараф этган ҳолда АСКУЭ тизимини 100 фоиз ишга тушириши керак», — деди Шавкат Мирзиёев.

Аввалроқ 2020 йил декабрида АСКУЭ (электр энергиясини ҳисобга олиш ва назорат қилишнинг автоматлаштирилган тизими) тизими 2021 йил апрелидан тўлиқ ишга тушиши режалаштирилгани маълум қилинган эди. Президентнинг 2018 йил октябрдаги қарорида эса электрон ҳисоблагичли абонентлар қамровини 2021 йил якунигача 100 фоизга етказиш вазифаси қўйилганди.

Маълумот учун, электр энергиясини ҳисобга олиш ва назорат қилишнинг автоматлаштирилган тизимига жами 7 миллион 418 мингдан зиёд истеъмолчини улаш режалаштирилган.