Toshkentda Mingo‘rik arxeologik yodgorligining muhofaza hududida IIBB Ma’naviyat va ma’rifat markazi binosini qurish Madaniy meros departamenti va uning hududiy boshqarmasidan ruxsat olmasdan boshlangan. Bu haqda olib borilgan dastlabki o‘rganishlar natijalariga ko‘ra Senatning Yoshlar, madaniyat va sport masalalari qo‘mitasi ma’lum qildi.
Eslatib o‘tamiz, Mingo‘rik yaqinida joylashgan uylarda yashovchi aholi qurilish ishlari boshlangan tufayli yodgorlikka zarar yetishidan xavotirga tushgandi. Ular qurilish texnikasi ta’sirida yuzaga keladigan tebranish qadimiy yodgorlikka jiddiy shikast yetkazishi mumkinligini bildirgan. Ikki ming yillik tarixga ega ushbu yodgorlikda yoriqlar paydo bo‘lgani bundan bir necha yil avval ham xavotirga solgandi.
Toshkent shahar IIBB hech kim yodgorlikni buzish niyatida emasligini, qurilish ishlari yodgorlikka ta’sir ko‘rsatishi yoki ko‘rsatmasligi haqida xulosa beruvchi ekspertlarga tegishli hujjatlar taqdim etilganini ma’lum qilgan.
Toshkent shahar Madaniy meros boshqarmasi tomonidan 4-mayda o‘tkazilgan monitoring jarayonida ushbu qurilish ishlari to‘xtatilmaganligi aniqlangan. Shu sababli holat yuzasidan chora ko‘rilishida amaliy yordam so‘rab Toshkent shahar prokuraturasiga murojaat qilingan.
5-may kuni qurilish ishlari vaqtinchalik to‘xtatib qo‘yilgan. 6-may kuni Toshkent shahar IIBB tomonidan Toshkent shahar Madaniy meros boshqarmasiga taqdim etilgan qurilish bilan bog‘liq loyiha hujjatlari departamenti huzuridagi Ilmiy ekspert kengashi tomonidan rad qilingan va navbatdagi ilmiy kengashiga taqdim etish taklifi bildirilgan. Arxeolog mutaxassislar tomonidan qayta xulosalar olingan.
Senat xabarida aytilishicha, mazkur masala Senatning Yoshlar, madaniyat va sport masalalari qo‘mitasi tomonidan doimiy nazoratga olingan.
Izoh (0)