Тошкентда Мингўрик археологик ёдгорлигининг муҳофаза ҳудудида ИИББ Маънавият ва маърифат маркази биносини қуриш Маданий мерос департаменти ва унинг ҳудудий бошқармасидан рухсат олмасдан бошланган. Бу ҳақда олиб борилган дастлабки ўрганишлар натижаларига кўра Сенатнинг Ёшлар, маданият ва спорт масалалари қўмитаси маълум қилди.
Эслатиб ўтамиз, Мингўрик яқинида жойлашган уйларда яшовчи аҳоли қурилиш ишлари бошланган туфайли ёдгорликка зарар етишидан хавотирга тушганди. Улар қурилиш техникаси таъсирида юзага келадиган тебраниш қадимий ёдгорликка жиддий шикаст етказиши мумкинлигини билдирган. Икки минг йиллик тарихга эга ушбу ёдгорликда ёриқлар пайдо бўлгани бундан бир неча йил аввал ҳам хавотирга солганди.
Тошкент шаҳар ИИББ ҳеч ким ёдгорликни бузиш ниятида эмаслигини, қурилиш ишлари ёдгорликка таъсир кўрсатиши ёки кўрсатмаслиги ҳақида хулоса берувчи экспертларга тегишли ҳужжатлар тақдим этилганини маълум қилган.
Тошкент шаҳар Маданий мерос бошқармаси томонидан 4 майда ўтказилган мониторинг жараёнида ушбу қурилиш ишлари тўхтатилмаганлиги аниқланган. Шу сабабли ҳолат юзасидан чора кўрилишида амалий ёрдам сўраб Тошкент шаҳар прокуратурасига мурожаат қилинган.
5 май куни қурилиш ишлари вақтинчалик тўхтатиб қўйилган. 6 май куни Тошкент шаҳар ИИББ томонидан Тошкент шаҳар Маданий мерос бошқармасига тақдим этилган қурилиш билан боғлиқ лойиҳа ҳужжатлари департаменти ҳузуридаги Илмий эксперт кенгаши томонидан рад қилинган ва навбатдаги илмий кенгашига тақдим этиш таклифи билдирилган. Археолог мутахассислар томонидан қайта хулосалар олинган.
Сенат хабарида айтилишича, мазкур масала Сенатнинг Ёшлар, маданият ва спорт масалалари қўмитаси томонидан доимий назоратга олинган.
Изоҳ (0)