Transport vazirligi va AOKA hamkorligida 7-may, juma kuni jurnalistlar uchun tashkil etilgan press-turda “Daryo” muxbiri Mirolim Isajonovga intervyu bergan Toshkent metropoliteni rahbari Oybek Xudoyqulov metrolarda tabaqalashgan tarif tizimi qachondan amaliyotga joriy etilishi haqida so‘z yuritdi.
“Bu tizim bo‘yicha ish olib boryapmiz, jarayon ketyapti. Bu katta loyiha bo‘lgani uchun qilinadigan ishlarimiz ko‘p. Biz bu borada birinchi bosqichni boshladik. Ya’ni butun metropolitenda yuz foiz elektron pul to‘lov tizimi o‘rnatildi.
Bugungi kunda avtobuslarning ham 50—60 foizida mazkur tizim qo‘yilgan. Hozir chet eldan olib kelinayotgan validatorlarni avtobuslarning barchasiga to‘liq o‘rnatib olishimiz kerak. Ochig‘i, bu jarayonning sekinlashishiga pandemiyaning ham ta’siri bo‘lyapti. Chunki ayrim davlatlar validatorlarni vaqtida yetkazib bera olmayapti. Avtobuslarda ham avtomatlashtirilgan to‘lov tizimini yuz foiz yakunlaganimizdan keyin yil yakunigacha ikkinchi bosqich — metrolarda tabaqalashgan tarif tizimini yo‘lga qo‘yish rejalashtirilgan”, — dedi Xudoyqulov.
Eslatib o‘tamiz, avvalroq transport vaziri Ilhom Mahkamov 2021-yilning iyun oyigacha Toshkent metropolitenida tabaqalashgan tarif tizimi yo‘lga qo‘yilishi kutilayotgani haqida gapirgan edi.
Izoh (0)