Транспорт вазирлиги ва АОКА ҳамкорлигида 7 май, жума куни журналистлар учун ташкил этилган пресс-турда «Дарё» мухбири Миролим Исажоновга интервью берган Тошкент метрополитени раҳбари Ойбек Худойқулов метроларда табақалашган тариф тизими қачондан амалиётга жорий этилиши ҳақида сўз юритди.
«Бу тизим бўйича иш олиб боряпмиз, жараён кетяпти. Бу катта лойиҳа бўлгани учун қилинадиган ишларимиз кўп. Биз бу борада биринчи босқични бошладик. Яъни бутун метрополитенда юз фоиз электрон пул тўлов тизими ўрнатилди.
Бугунги кунда автобусларнинг ҳам 50—60 фоизида мазкур тизим қўйилган. Ҳозир чет элдан олиб келинаётган валидаторларни автобусларнинг барчасига тўлиқ ўрнатиб олишимиз керак. Очиғи, бу жараённинг секинлашишига пандемиянинг ҳам таъсири бўляпти. Чунки айрим давлатлар валидаторларни вақтида етказиб бера олмаяпти. Автобусларда ҳам автоматлаштирилган тўлов тизимини юз фоиз якунлаганимиздан кейин йил якунигача иккинчи босқич — метроларда табақалашган тариф тизимини йўлга қўйиш режалаштирилган», — деди Худойқулов.
Эслатиб ўтамиз, аввалроқ транспорт вазири Илҳом Маҳкамов 2021 йилнинг июнь ойигача Тошкент метрополитенида табақалашган тариф тизими йўлга қўйилиши кутилаётгани ҳақида гапирган эди.
Изоҳ (0)