“Hozir videoga olish ham ‘talant’ bo‘lib qoldi” — Toshkent metropoliteni rahbari metroda kuzatilayotgan turli holatlar haqida

Transport vazirligi va AOKA hamkorligida 7-may, juma kuni jurnalistlar uchun tashkil etilgan press-turda OAV vakillariga intervyu bergan Toshkent metropoliteni rahbari Oybek Xudoyqulov so‘nggi paytlarda kuzatilayotgan metro bilan bog‘liq vaziyatlar bo‘yicha munosabat bildirdi. Bu haqda “Daryo” muxbiri xabar bermoqda.

“40 yil mobaynida bu kabi holatlar ommaviy axborot vositalariga olib chiqilmagan. Poyezd to‘xtashi, eshiklar ochilmay qolishi singari vaziyatlar kuzatilgan, lekin yaqin kunlardagi kabi vahimali holatlar bo‘lmagan. Oxirgi uch oy ichida bu kabi holatlar besh marta kuzatildi. To‘g‘ri, xavfsizlik nuqtayi nazaridan oladigan bo‘lsak, bunday vaziyatlar bo‘lishi kerak emas. Bu borada ishchi guruhlar tuzilgan, ‘nima uchun bo‘ldi?’ degan savolga javob topish va uni bartaraf qilish uchun ishlar olib borilyapti.

Yaqinda yana bir holat bo‘ldi: ikkita poyezdning qo‘shilgan holda turganini kameraga olib, poyezd kelib urildi, deb internetga chiqarishdi. Vaholanki, ‘Chorsu’ bekatida boshlangan ishni ‘Beruniy’ metrobekatiga borganda tasvirga tushirishgan. Hozir videoga olish ham ‘talant’ bo‘lib qoldi, qanday olib, ommaga yetkazishiga ham bog‘liq bo‘lib qoldi. Natijada, to‘g‘ri tushuniladigan narsalar noto‘g‘ri tushunilyapti. Bugun hammaning qo‘lida telefon. Tasvirga olmanglar, demayapmiz. Yurtdoshlarimiz surat, videolar olishib, holatni o‘zlari istagancha talqin qilib, tarqatib yuborishmoqda”, — dedi Oybek Xudoyqulov.

Toshkent metropoliteni rahbari yoshlar tomonidan metro vagonlarida tashkil etilgan choyxona va “to‘y”lar haqida ham o‘z fikrlarini aytdi.

“Bir guruh yoshlar metroga tushib, vagon ichida choyxona tashkillashtirishgani, kelin salom o‘tkazishgani, bekatlardan biridagi soatga xakerlar hujum qilib, bo‘lmag‘ur so‘zlar yozib qo‘yilgani mentalitetimizga to‘g‘ri kelmaydi. Men bunga qarshiman. Bu kabi holatlar takrorlanmasligi uchun yoshlarimizga buni noto‘g‘ri ekanini tushuntirishimiz, ular bilan ishlashimiz kerak. Agar shunday davom etsak, yaxshi oqibatlarga olib kelmaydi”, — dedi Xudoyqulov.