Koronavirusga qarshi 1-doza vaksinalarini olganlarda kuzatilgan nojo‘ya ta’sirlar 2-bosqichda ham kuzatilishi mumkinmi? Mutaxassis javob berdi

Koronavirusga qarshi 1-doza vaksinalarini olganlarda kuzatilgan nojo‘ya ta’sirlar 2-bosqichda ham kuzatilishi mumkinmi? SSV matbuot xizmatining ushbu savoliga vazirlik huzuridagi Koronavirusga qarshi kurashish shtabi a’zosi, tibbiyot fanlari doktori Sevara Ubaydullayeva javob berdi.

“Vaksinadan keyingi nojo‘ya ta’sirlar agarda 1-bosqich emlashda kuzatilgan bo‘lsa, ya’ni ularda emlanishdan keyin uch kun ichida tana haroratining 38 darajagacha ko‘tarilishi, vaksina olgan joyda qizarish, salgina og‘riq yoki bo‘rtib turishlar, ba’zida yengil o‘tib ketuvchi (2—3 kunda) shamollash alomatlari, mushaklarda yoki bo‘g‘imlarda 1—2 kunlik og‘riqlar kuzatilgan bo‘lsa, bu holatlar 2-bosqichdan keyin aynan shu odamlarda kuzatilishi ham, kuzatilmasligi ham mumkin. Sababi, vaksinadan keyingi vaqtinchalik reaksiyalar inson organizmining individual moslashuvchanligidir”, — deydi mutaxassis.

Avvalroq Sevara Ubaydullayeva koronavirusga qarshi emlash jarayoni har yili o‘tkazilishi mumkinligini aytgandi.

May oyining boshlarida Sog‘liqni saqlash vazirligi matbuot xizmati O‘zbekistonda koronavirusga qarshi vaksina olgan hech bir fuqaroda COVID-19 bilan kasallanish holati aniqlanmaganini ma’lum qilgandi. Innovatsion rivojlanish vazirligi ma’lumotlariga ko‘ra, emlangandan keyin kuzatilishi mumkin bo‘lgan eng jiddiy reaksiya anafilaksiyadir.