“Daryo” internet-nashri va O‘zbekiston musulmonlari idorasining “Muslim.uz” portali o‘zaro hamkorlikda muborak oyga bag‘ishlangan “Oylar sultoni — Ramazon” loyihasini taqdim etadi.
Loyiha doirasida taniqli ulamolar va diniy soha xodimlari mohi Ramazon fazilati to‘g‘risidagi oyati karimalar, hadisi shariflar sharhi hamda ro‘za tutish bilan bog‘liq savollarga javob beradi.
Navbatdagi suhbat O‘zbekiston musulmonlari idorasi Fatvo bo‘limi mutaxassisi Muhammadjon Ibragimov bilan uyushtirildi.
Hovlimni sotsam, undan zakot beramanmi?
Yashab turgan hovlingizning sotish uchun ajratilgan qismi to sotilmagunicha uning qiymatidan zakot berish vojib bo‘lmaydi. Chunki shariatimizda sotish niyatida olinmagan, keyinchalik sotish niyati paydo bo‘lgan mollarga “tijorat moli” deyilmaydi.Hanafiy mazhabidagi mashhur bo‘lgan kitoblardan biri “Sharhul viqoya” kitobida ham bu haqda bayon qilingan: “(Mulkka egador bo‘lish vaqtida sotish niyati bo‘lmagan) narsani sotish niyat qilinsa-da, to sotilmagunicha u tijorat moliga aylanmaydi”.
Demak, bunday holatda, sotuvga qo‘yilgan qism zakot nisobi miqdoricha yoki undan ko‘p mablag‘ga sotilsa va bir yil ehtiyojdan ortiqcha bo‘lib tursa, o‘sha mablag‘ning qirqdan birini zakot qilib berasiz. Agar siz har yili nisob miqdoridagi mablag‘ga ega bo‘lib, zakot berib yurgan bo‘lsangiz, hovli sotilgan yilidayoq, qo‘lingizdagi mablag‘ga qo‘shib, umumiy summaning qirqdan birini zakot qilib ajratasiz.
Zakotni kechiktirish mumkinmi?
Zakot vojib bo‘lgan kishilar uni kechiktirmay ado qilishlari lozim. Agar moli nisobga yetgandan keyin, bir yil o‘tgach, zakot bermasa, so‘ngra ikkinchi yil yetib kelsa, gunohkor bo‘ladi va Alloh taologa istig‘for aytib, ikki yillik zakotni ado qiladi. O‘tgan yillik zakotni zimmasida qoldirmaydi.Mening ayolimni tillo taqinchoqlari zakot nisobiga yetgan. Lekin qo‘lida puli yo‘q. U zakotni qanday beradi?
Mulk kimniki bo‘lsa, zakot ham uning zimmasiga bo‘ladi. Ayol kishi taqinchoqlaridan zakot miqdorichasini sotib, zakotini beradi. Agar ayol eridan meni zakotlarimni to‘lab bering, deb iltimos qilsa va er ado qilsa, xotinning zimmasidan zakot ado bo‘ladi. Agar bularning imkoni bo‘lmasa, qarz olib bo‘lsa ham zakotni ado qilishi lozim bo‘ladi.Ma’lumot uchun: Sizda shar’iy masalalarda savollar bo‘lsa, O‘zbekiston musulmonlari idorasining Telegram’dagi @diniysavollar kanaliga, “savollar.muslim.uz” saytiga yoki fatvo bo‘limining 78-150-33-44 raqamli koll-markaziga murojaat qilishingiz mumkin.
Izoh (0)