10-may kuni Toshkentda O‘zbekiston Investitsiyalar va tashqi savdo vazirligi hamda Fransiya taraqqiyot agentligi (FTA) o‘rtasidagi hamkorlik bitimi tasdiqlandi. Bu haqda FTA matbuot xizmatiga tayanib, “Gazeta.uz” xabar berdi. Hamkorlik dasturi 2021—2025-yillarga mo‘ljallangan.
Bu davr oralig‘ida FTA O‘zbekistondagi islohotlarni qo‘llab-quvvatlash uchun zayomlar, texnik yordam va grantlar ko‘rinishida 1 milliard yevroga yaqin mablag‘ni jalb etishni rejalashtirgan.
Imzolash marosimi Fransiyaning Yevropa va tashqi ishlar vazirligi huzuridagi tashqi savdo va iqtisodiy jozibadorlik bo‘yicha vakil-vaziri Frank Rister hamda O‘zbekiston bosh vaziri o‘rinbosari — investitsiyalar va tashqi savdo vaziri Sardor Umrzoqov ishtirokida bo‘lib o‘tgan.
FTAning “Yashil o‘sish va birdamlik” mandatiga muvofiq, shuningdek, iqlim bo‘yicha Parij bitimi doirasida suv ta’minoti va sanitariya, energetika va gidroenergetika, energiya tejovchi texnologiyalardan muqobil energiya manbai sifatida foydalanish, qishloq xo‘jaligi, atrof-muhit himoyasi va barqaror resurslarni boshqarish, shu jumladan, qattiq maishiy chiqindilarni boshqarish, xususiy sektorni qo‘llab-quvvatlash va budjetni qo‘llab-quvvatlash uchun zayomlar ajratish amalga oshiriladi.
O‘rmonchilik va mahalliy qishloq xo‘jaligini rivojlantirish sohasidagi loyihalarning birini Orol dengizi mintaqasida amalga oshirish ko‘zda tutilgan. FTA unda Yevropa investitsiya banki bilan birgalikda moliyalashtiruvchi rolini bajaradi.
Ma’lumot uchun, FTA 2016-yildan buyon O‘zbekistonda hukumat darajasidagi yettita yo‘nalishni amalga oshirmoqda. Buning ichidan turli sektorlardagi loyihalarni moliyalashtirish (qattiq maishiy chiqindilar, sanitariya, gidroenergetika, chorvachilik), shuningdek, budjet moliyalashtirishi uchun zayomlar (iqtisodiy va moliyaviy boshqaruv, energetika va iqlim) kiradi. Shu bilan birga, moliyaviy majburiyatlarning umumiy miqdori suveren kreditlar ko‘rinishida 630 million yevroni tashkil etadi.
Eslatib o‘tamiz, 2018-yilda Fransiya taraqqiyot agentligi O‘zbekistondagi loyihalarga 450 million yevro sarmoya kiritishi, O‘zbekistonga budjetga ko‘maklashish uchun 150 million yevro taqdim etishi to‘g‘risida xabar berilgandi.
Izoh (0)