16-dekabr kuni Chilonzor tumani “Toshkent savdo markazi” kompleksi hududida N.M. ismli fuqaro o‘z akasi O.M.ni pichoq bilan urib, tan jarohati yetkazgani va O.M. olgan tan jarohati bilan shifoxonada vafot etgani to‘g‘risida xabar berilgandi. “Gazeta.uz”ning yozishicha, 10-may kuni jinoyat ishlari bo‘yicha Chilonzor tuman sudining ochiq sud majlisida mazkur jinoyat ishi ko‘rib chiqilib, sud hukmi e’lon qilingan.
Unga ko‘ra, jabrlanuvchining qonuniy vakili — marhumning rafiqasi qaynukasi oilani yagona boquvchisi ekani, unga nisbatan hech qanday da’vosi yo‘qligi sababli ozodlikdan mahrum etish bilan bog‘liq bo‘lmagan jazo tayinlashni so‘ragan. Aka-ukaning onasi ham xuddi shunday fikrda ekanini ma’lum qilgan.
Sudlanuvchi N.M.ga Jinoyat kodeksining 104-modda (qasddan badanga og‘ir shikast yetkazish) 3-qismi “d” bandi bilan Jinoyat kodeksining 57-moddasini (yengilroq jazo tayinlash) qo‘llab, 5 yil muddatga ozodlikdan mahrum qilish jazosi tayinlangan. Jazoni umumiy tartibli koloniyalarda o‘tash belgilangan.
Avvalroq Qoraqalpog‘istonda mast holdagi 57 yoshli erkak xotini va 18 yoshli qizini o‘ldirib qo‘ygani, Navoiyda 30 yoshli aqli zaif fuqaro onasini pichoqlab o‘ldirgani hamda Farg‘onada 19 yoshli yigit uni mazax qilib, spirtli ichimlik olib berishga majburlagan ikki mast erkakni pichoqlagani haqida xabar berilgandi.
Izoh (0)