“O‘zbekiston tovar-xomashyo birjasi”da Ai-80 markali benzin qariyb 3 foizga ko‘tarildi

“O‘zbekiston tovar-xomashyo birjasi”da 1 tonna Ai-80 markali benzin narxi qariyb 3 foizga ko‘tarildi, deya xabar bermoqda birja matbuot xizmati.

Qayd etilishicha, 2021-yil 3—9-may kunlari tovar-xomashyo birjasiga 30 291 tonna Ai-80 markali avtomobil benzini qo‘yildi va ulardan 18 348 tonnasi, ya’ni 60,6 foizi sotildi.

Ko‘rib chiqilayotgan davrda Ai-80 markali avtomobil benzinining o‘rtacha kunlik narxi bir tonnasi uchun 6 million 503 ming 600 so‘mdan 6 million 680 ming 900 so‘mgacha (2,7 foizga) ko‘tarildi.

Ushbu davrda Ai-80 markali avtomobil benzinining o‘rtacha haftalik kotirovkasi 6 million 619 ming 900 so‘mni, Ai-91 esa 7 million 665 ming 600 so‘mni tashkil etdi.

Turli manbalarda keltirilishicha, avtomobil benzinining bir tonnasi o‘rtacha 1293—1370 litrni tashkil qiladi.

Avvalroq Toshkentda barcha markalardagi benzin narxi ko‘tarilgani to‘g‘risida xabar berilgandi.