Озарбайжон президенти Қорабоғдаги можаро ҳал қилингани ва бу масалага қайтиш бефойдалигини айтди

Озарбайжон президенти Илҳом Алиев Қорабоғ можароси ҳал қилинганини ва бу масалага қайтишдан фойда йўқлигини айтди, деб ёзади «РИА Новости».

«Такрор айтаман, урушдан кейин Тоғли Қорабоғ можароси ҳал қилингани ҳақида мен бир неча бор айтганман. Озарбайжон ушбу можарони жанг майдонида ҳам, музокара столида ҳам якка ўзи ҳал қилди. Жанг майдонидаги ғалаба душманни оқ байроқ кўтаришга ва таслим бўлиш актига имзо чекишга мажбур қилди. 10 ноябрда имзоланган ҳужжат Арманистоннинг таслим бўлиш актидир. Озарбайжонда Тоғли Қорабоғ деган ҳудудий бирлик йўқ. Можаро ҳал қилинди ва бу масалага қайтиш бефойда деб ўйлайман. Қандай бўлмасин, биз буни урушдан кейинги даврда намойиш этдик», — деди Алиев Озарбайжон давлат телевидениесига берган интервьюсида.

Унинг сўзларига кўра, «агар кимдир Тоғли Қорабоғ можароси ҳал қилинмаган деб ҳисобласа, бу унинг муаммоси».

«Иккинчидан, бу ўта хавфли ёндашув. Агар можаро ҳал этилмаган бўлса, унда уни қандай ҳал қилиш керак? Демак, бу 10 ноябрда имзоланган баёнот ўз кучини йўқотганини билдирадими? Мен буни шундай тушунаман. 10 ноябрда низони ҳал этиш тўғрисидаги ҳужжат имзоланган. Бу ҳужжат баъзилар наздидаги каби фақат ўт очишни тўхтатиш ҳақида эмас. Кўзларини каттароқ очиб, унда яна қанча банд борлигини кўришсин. Ўт очишни тўхтатиш тўғрисидаги ҳужжатда яна кўплаб масалалар, жумладан, коммуникацияларни йўлга қўйишни кўриб чиқиш ҳақидаги бандлар ҳам бор. Агар зиддият ҳал этилмаса, қандай коммуникация ҳақида гап бўлиши мумкин? Можаро тугамаган бўлса, унда нега Озарбайжон, Арманистон ва Россия бош вазирларининг ўринбосарлари учрашувлар ўтказиб, келишувларга эришмоқда?»— деди Алиев.

Шунингдек, у Арманистон ҳудудларининг қайтарилиши ва Тоғли Қорабоғнинг мақоми тўғрисидаги баёнотлардан воз кечишга чақирди. «Гапни кўпайтирмаслик ва муносабатларимизни ёмонлаштирмаслик учун мақом ёки можаро ҳақида ҳеч қандай баёнот бермасликни маслаҳат бераман», — деди Алиев.

2020 йилнинг сентябрь ойи охирида Тоғли Қорабоғда Озарбайжон ва Арманистон давлатлари ўртасида қуролли низо келиб чиққан эди. 2020 йилнинг 10 ноябрида ўт очишни тўхтатиш тўғрисидаги уч томонлама келишув имзоланиши билан низолар якунига етди. Унга кўра, Боку Тоғли Қорабоғ билан қўшни етти вилоят, шунингдек, Шуша ва Гадрут шаҳарлари устидан назоратни қайта тиклади. Ҳудуднинг қолган қисмига Россия тинчликпарварлари жойлаштирилди. Бундан ташқари, келишув Озарбайжон ва Арманистон ўртасидаги алоқалар ва савдо-иқтисодий муносабатларнинг бошланишини назарда тутади.