Buxoroda TikTok uchun drift qilgan haydovchiga chora ko‘rildi, “Jiguli”si jarima maydoniga joylashtirildi

Buxoroda “VAZ-2107” avtomobilida shahar ko‘chalari bo‘ylab drift uyushtirgan haydovchiga jazo tayinlandi, deb xabar beradi IIV matbuot xizmati.

Haydovchi o‘z avtomobilida o‘ta xavfli manyovrlarni amalga oshirib, harakatlangani aks etgan videolarni TikTok’dagi sahifasiga joylashtirgan.

Buxoro viloyati IIB YHXB xodimlari tomonidan olib borilgan surishtiruv ishlari davomida qoidabuzar haydovchi aniqlangan va Ma’muriy javobgarlik to‘g‘risidagi kodeksning tegishli moddalari bo‘yicha bayonnoma rasmiylashtirilgan. Transport vositasi jarima maydonchasiga joylashtirilgan.

Avvalroq Toshkent viloyatida raqamlarini berkitib drift-shou uyushtirgan haydovchilar jazolangani to‘g‘risida xabar berilgandi.