Коронавирусга қарши 1-доза вакциналарини олганларда кузатилган ножўя таъсирлар 2-босқичда ҳам кузатилиши мумкинми? ССВ матбуот хизматининг ушбу саволига вазирлик ҳузуридаги Коронавирусга қарши курашиш штаби аъзоси, тиббиёт фанлари доктори Севара Убайдуллаева жавоб берди.
«Вакцинадан кейинги ножўя таъсирлар агарда 1-босқич эмлашда кузатилган бўлса, яъни уларда эмланишдан кейин уч кун ичида тана ҳароратининг 38 даражагача кўтарилиши, вакцина олган жойда қизариш, салгина оғриқ ёки бўртиб туришлар, баъзида енгил ўтиб кетувчи (2—3 кунда) шамоллаш аломатлари, мушакларда ёки бўғимларда 1—2 кунлик оғриқлар кузатилган бўлса, бу ҳолатлар 2-босқичдан кейин айнан шу одамларда кузатилиши ҳам, кузатилмаслиги ҳам мумкин. Сабаби, вакцинадан кейинги вақтинчалик реакциялар инсон организмининг индивидуал мослашувчанлигидир», — дейди мутахассис.
Аввалроқ Севара Убайдуллаева коронавирусга қарши эмлаш жараёни ҳар йили ўтказилиши мумкинлигини айтганди.
Май ойининг бошларида Соғлиқни сақлаш вазирлиги матбуот хизмати Ўзбекистонда коронавирусга қарши вакцина олган ҳеч бир фуқарода COVID-19 билан касалланиш ҳолати аниқланмаганини маълум қилганди. Инновацион ривожланиш вазирлиги маълумотларига кўра, эмлангандан кейин кузатилиши мумкин бўлган энг жиддий реакция анафилакциядир.
Изоҳ (0)