O‘zbekistonda koronavirusga qarshi vaksina olgan hech bir fuqaroda COVID-19 bilan kasallanish holati aniqlanmagan. Bu haqda Sog‘liqni saqlash vazirligi matbuot xizmati xabar berdi.

Foto: “Daryo” / Madina Nurman

Eslatib o‘tamiz, 1-maydan O‘zbekistonda vaksinatsiyaning ikkinchi oyi boshlandi. Vaksinatsiyaning birinchi bosqichi 1-apreldan boshlangandi. Dastlabki bosqichda 65 yoshdan kattalar, surunkali kasalligi borlar, tibbiyot va ta’lim muassasalari (maktab va bog‘cha) xodimlari, shuningdek, huquq-tartibot organlari vakillari emlangan. 4-may holatiga ko‘ra, mamlakatda koronavirusga qarshi emlanganlar soni 960 ming kishidan oshdi.

“Qariyb bir oy davomida 800 ming nafarga yaqin aholi kasallikka qarshi emlangan, 8 ming nafardan ortiq fuqaro kasallikka yo‘liqqan. Bu har 100 ta emlanish holatiga 1 ta kasallanish holati to‘g‘ri kelyapti degani. Ta’kidlash lozimki, hali virusga qarshi vaksina olgan hech bir fuqaroda koronavirus bilan kasallanish holati aniqlanmadi. Shunday ekan, hamyurtlarimiz vaksinatsiya jarayonlarida faol bo‘lishlari kasallik tarqalishini to‘xtatishning asosiy omili bo‘lishi mumkin”, — deyiladi xabarda.

Ta’kidlanishicha aprel oxiriga qadar xavf osti guruhiga kiritilgan aholining 25,3 foiz qismi koronavirusga qarshi emlangan:

  • 65 yosh va undan katta fuqarolar — 350 263 nafar;
  • tibbiyot xodimlari — 265 217 nafar;
  • maktab o‘qituvchilari — 117 384 nafar;
  • maktabgacha ta’lim muassasalari xodimlari — 36 699 nafar;
  • surunkali kasalligi bor fuqarolar — 28 218 nafar.

Sog‘liqni saqlash vazirligi kasallik tarqalishining oldini olishda karantin talablariga amalga qilish va emlanish zarurligini eslatib o‘tgan. “Agar shu ikki chorani birdek ishga solsak, koronavirusni yengib chiqishimiz ehtimoli ikki karra oshgan bo‘ladi”, — deya ta’kidlanadi xabarda.