Volkswagen kompaniyasi avtopilotdan foydalanish huquqini soatiga 7 yevrodan sotishni rejalashtirmoqda. Avtomobil egalari ushbu funksiyaga istalgan vaqtda ulanishi yoki uni o‘chirib qo‘yishi mumkin, deb xabar beradi Motor.
Volkswagen’ning savdo va marketing bo‘limi boshlig‘i Klaus Zellmerning ta’kidlashicha, bu kabi usul ham xaridor, ham kompaniya uchun foydali. Avtomobilga avval boshidan barcha zaruriy qurilmalar o‘rnatiladi, biroq mijoz ulardan foydalana olmaydi — uni qo‘shimcha to‘lov evaziga faollashtirish mumkin.
Ayrimlar bu kabi usulni tanqid qilmoqda, chunki bu mijozlarni ikki marta pul to‘lashga majbur qiladi. Norozilarning asosiy dalili — funksiyalar zavoddaligidayoq o‘rnatilgan bo‘lsa, nima uchun mashina egasi undan foydalanmasligi kerak? Volkswagen esa bunga mutlaqo qarshi.
Volkswagen’ning hisoblashicha, har bir avtomobilni buyurtma asosida alohida jihozlashdan ko‘ra, ularga ishlab chiqarish jarayonidayoq barcha kerakli qurilmalarni o‘rnatish va mijozlardan buning uchun qo‘shimcha haq olish foydaliroq. Mijoz o‘ziga qaysi opsiyalar kerakligini darhol hal etishi shart emasligi sabab bu unga ham foydali: u istalgan opsiyani xaridning ertasi kuni yoki besh yildan so‘ng yoqtirishi mumkin.
Kompaniya hisob-kitoblariga ko‘ra, avtopilotni o‘rnatish kamida 10 ming yevro turadi. Avtomobil xarid qilishda bu kabi qo‘shimcha mablag‘ni to‘lashga hamma ham rozi bo‘lmaydi, shu sababli kompaniyaning foyda ko‘rishdagi yagona imkoniyati — avtopilot funksiyasini soatini yetti yevrodan ijaraga berish tizimi.
Avvalroq Volkswagen Nokia kompaniyasi taqdiridan qochmoqchi ekanligi, kompaniya akkumulyatorlarni qayta ishlaydigan zavodni ishga tushirgani to‘g‘risida xabar berilgandi.
Izoh (0)