Farg‘ona viloyatining Bag‘dod tumanida o‘lim bilan bog‘liq yo‘l-transport hodisasi sodir bo‘ldi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, 4-may kuni fuqaro A.A. boshqaruvidagi Damas rusumli avtomashina Bag‘dod tumani Qo‘shtegirmon qishlog‘i hududida ketayotib, yo‘lning qatnov qismini piyoda kesib o‘tayotgan 9 yoshli T.M.ni urib yuborgan. Oqibatda T.M. tan jarohati olib, hodisa joyida vafot etgan.
Holat yuzasidan Farg‘ona shahar IIO FMB huzuridagi tergov bo‘linmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Ayni paytda tergov harakatlari davom etmoqda.
Avvalroq Surxondaryoda 3 kishini urib yuborgan Damas haydovchisi voqea joyidan qochib ketgani, oqibatda jabrlanganlarning ikki nafari vafot etgani haqida xabar berilgandi.
Izoh (0)