RubiX auksioni orqali o‘nta Lykan HyperSport Livan superkarlaridan biri sotuvga qo‘yildi. Ushbu avtomobillar “Forsaj”ning yettinchi qismi uchun maxsus yaratilgan, deb xabar beradi Motor.
Sotuvga qo‘yilgan nusxa — suratga olish ishlarida omon qolgan yagona model hisoblanadi. Film bosh qahramonlari Dominik Toretto va Brayan O’konnor ushbu superkarda Abu-Dabidagi osmono‘par binolar uzra sakrashni amalga oshirgan.
Avtomobil suratga olish jarayonida omon qolganiga qaramay, unga baribir yetarlicha shikast yetgan. Xususan, kuzovi tirnalgan, yon oynalari singan, salonida qurilmalar paneli hamda mediatizimi yo‘q. Shu bilan birga, sportkarning o‘ziga xos jihati ham bor — u 11520x6480 pikselli suratlardan iborat kollajli NFT-tokenlar bilan birga sotilmoqda.
NFT-token — bu kriptovalyuta tokenlarning bir ko‘rinishi. Ularni almashtirib bo‘lmaydi, ya’ni har bir nusxa noyob va uni boshqa tokenga almashtirishning imkoni yo‘q. Token yaratuvchilarining ta’kidlashicha, ular tomonidan yaratilgan art-obyekt noyob hisoblanadi, chunki bunga qadar avtomobillarga bag‘ishlangan tokenlar bo‘lmagan va xaridorlarga haqiqiy mashina bilan birga sotilmagan.
Haqiqiy Lykan HyperSport superkariga 750 ot kuchi va 960 Nm aylanuvchi momentga ega 3,7 litrli turbomotor o‘rnatilgan. Mazkur avtomobilning narxi 3,4 million dollardan boshlanadi. Suratga olish jarayoni uchun yaratilgan superkarlar biroz o‘zgartirilgan — ularga 240 ot kuchiga ega 2,7 litrli V6 o‘rnatilgan. Auksion tashkilotchilari “Forsaj” avtomobili uchun 2,5 million dollar ishlab olishni rejalashtirmoqda.
Avvalroq Avstraliyada “Forsaj” filmida suratga tushgan 50 yillik Chevrolet auksionga qo‘yilgani, Pol Uokerga tegishli bo‘lgan o‘rta motorli BMW M1 superkari sotilayotgani to‘g‘risida xabar berilgandi.
Izoh (0)