Volkswagen компанияси автопилотдан фойдаланиш ҳуқуқини соатига 7 евродан сотишни режалаштирмоқда. Автомобиль эгалари ушбу функцияга исталган вақтда уланиши ёки уни ўчириб қўйиши мумкин, деб хабар беради Motor.
Volkswagen’нинг савдо ва маркетинг бўлими бошлиғи Клаус Зеллмернинг таъкидлашича, бу каби усул ҳам харидор, ҳам компания учун фойдали. Автомобильга аввал бошидан барча зарурий қурилмалар ўрнатилади, бироқ мижоз улардан фойдалана олмайди — уни қўшимча тўлов эвазига фаоллаштириш мумкин.
Айримлар бу каби усулни танқид қилмоқда, чунки бу мижозларни икки марта пул тўлашга мажбур қилади. Норозиларнинг асосий далили — функциялар заводдалигидаёқ ўрнатилган бўлса, нима учун машина эгаси ундан фойдаланмаслиги керак? Volkswagen эса бунга мутлақо қарши.
Volkswagen’нинг ҳисоблашича, ҳар бир автомобилни буюртма асосида алоҳида жиҳозлашдан кўра, уларга ишлаб чиқариш жараёнидаёқ барча керакли қурилмаларни ўрнатиш ва мижозлардан бунинг учун қўшимча ҳақ олиш фойдалироқ. Мижоз ўзига қайси опциялар кераклигини дарҳол ҳал этиши шарт эмаслиги сабаб бу унга ҳам фойдали: у исталган опцияни хариднинг эртаси куни ёки беш йилдан сўнг ёқтириши мумкин.
Компания ҳисоб-китобларига кўра, автопилотни ўрнатиш камида 10 минг евро туради. Автомобиль харид қилишда бу каби қўшимча маблағни тўлашга ҳамма ҳам рози бўлмайди, шу сабабли компаниянинг фойда кўришдаги ягона имконияти — автопилот функциясини соатини етти евродан ижарага бериш тизими.
Аввалроқ Volkswagen Nokia компанияси тақдиридан қочмоқчи эканлиги, компания аккумуляторларни қайта ишлайдиган заводни ишга туширгани тўғрисида хабар берилганди.
Изоҳ (0)