Bo‘lajak qirolichalar: Yevropa mamlakatlari taxtining asosiy 5 merosxo‘ri qanday ko‘rinishga ega? (foto)

O‘n yillardan so‘ng bu qizlar Yevropaning eng muhim davlatlarini boshqarishi mumkin, ammo hozircha ular maktabdagi o‘qishi va kelajakdagi orzulari haqida o‘ylamoqdalar. Qirollik oilalarining yosh merosxo‘rlari haqida ma’lumot beramiz.

Leonor (Ispaniya)

Qirolicha Letitsiya va qirol Filippning to‘ng‘ich qizi Leonor 2005-yil 31-oktabrda tug‘ilgan. Ayni paytda u otasidan keyingi Ispaniya taxtining birinchi merosxo‘ri hisoblanadi. Juftlikning kenja qizi Sofiya esa 2007-yil 29-aprelda tug‘ilgan. Opa-singillar bir-biriga juda yaqin va bo‘sh vaqtlarini birga o‘tkazishadi, ammo ularning xarakterini bir xil deb bo‘lmaydi: Leonor vazmin va fe’li keng, uning bu fe’li bo‘lajak malikaga xos, Sofiya esa juda quvnoq va tinib-tinchimas qiz.

Katarina-Amaliya (Niderlandiya)

2003-yil 7-dekabrda qirol Villyam-Aleksandr va qirolicha Maksimaning qizi — malika Katarina-Amaliya Beatriks Karmen Viktoriya dunyoga kelgan. Taxt vorisi bo‘lish bo‘yicha aynan u birinchi o‘rinni egallaydi. Bir necha yil o‘tgach esa singillari — malika Aleksiya Yuliana Marsela Lorentin va malika Ariana Vilgemina Maksima Ines tug‘ilgan.

Yelizaveta (Belgiya)

Belgiya qiroli Filipp va qirolicha Matildaning to‘ng‘ich qizi Yelizaveta 2001-yil 25-oktabrda tug‘ilgan va Belgiya taxtining merosxo‘ri hisoblanadi. Bo‘lajak qirolichaning ikki akasi — Gabriyell va Emmanuel va singlisi Eleanora bor.

Estel (Shvetsiya)

Estel 2012-yil 23-fevralda tug‘ilgan va Shvetsiya taxti merosxo‘ri, malika Viktoriya va uning turmush o‘rtog‘i Daniyel Vestlingning birinchi farzandi hisoblanadi. Shvetsiya qonunlariga ko‘ra Estel taxtga vorislik qilish bo‘yicha onasidan keyin ikkinchi o‘rinda turadi. Undan keyin uning ukasi — shahzoda Oskar taxtga da’vogarlik qilishi mumkin.

Ingrid-Aleksandra (Norvegiya)

Malika Ingrid-Aleksandra Norvegiyadagi vorislik reformasidan so‘ng mamlakatning birinchi malikasi bo‘ladi. Undan oldin taxtga o‘tirgan yagona ayol monarx — XIV asrning oxirida hukmronlik qilgan daniyalik Margaret bo‘lgan. Bo‘lajak malika 2004-yil 21-yanvarda dunyoga kelgan. Ingrid-Aleksandraning  tug‘ishgan ukasi Sverredan tashqari Marius ismli o‘gay ukasi ham bor. U taxtga vorislik qilish bo‘yicha uchinchi o‘rinda turadi.