Бўлажак қироличалар: Европа мамлакатлари тахтининг асосий 5 меросхўри қандай кўринишга эга? (фото)

Ўн йиллардан сўнг бу қизлар Европанинг энг муҳим давлатларини бошқариши мумкин, аммо ҳозирча улар мактабдаги ўқиши ва келажакдаги орзулари ҳақида ўйламоқдалар. Қироллик оилаларининг ёш меросхўрлари ҳақида маълумот берамиз.

Леонор (Испания)

Қиролича Летиция ва қирол Филиппнинг тўнғич қизи Леонор 2005 йил 31 октябрда туғилган. Айни пайтда у отасидан кейинги Испания тахтининг биринчи меросхўри ҳисобланади. Жуфтликнинг кенжа қизи София эса 2007 йил 29 апрелда туғилган. Опа-сингиллар бир-бирига жуда яқин ва бўш вақтларини бирга ўтказишади, аммо уларнинг характерини бир хил деб бўлмайди: Леонор вазмин ва феъли кенг, унинг бу феъли бўлажак маликага хос, София эса жуда қувноқ ва тиниб-тинчимас қиз.

Катарина-Амалия (Нидерландия)

2003 йил 7 декабрда қирол Виллям-Александр ва қиролича Максиманинг қизи — малика Катарина-Амалия Беатрикс Кармен Виктория дунёга келган. Тахт вориси бўлиш бўйича айнан у биринчи ўринни эгаллайди. Бир неча йил ўтгач эса сингиллари — малика Алексия Юлиана Марсела Лорентин ва малика Ариана Вильгемина Максима Инес туғилган.

Елизавета (Бельгия)

Бельгия қироли Филипп ва қиролича Матильданинг тўнғич қизи Елизавета 2001 йил 25 октябрда туғилган ва Бельгия тахтининг меросхўри ҳисобланади. Бўлажак қироличанинг икки акаси — Габриелл ва Эммануэль ва синглиси Элеанора бор.

Эстель (Швеция)

Эстель 2012 йил 23 февралда туғилган ва Швеция тахти меросхўри, малика Виктория ва унинг турмуш ўртоғи Даниэль Вестлингнинг биринчи фарзанди ҳисобланади. Швеция қонунларига кўра Эстель тахтга ворислик қилиш бўйича онасидан кейин иккинчи ўринда туради. Ундан кейин унинг укаси — шаҳзода Оскар тахтга даъвогарлик қилиши мумкин.

Ингрид-Александра (Норвегия)

Малика Ингрид-Александра Норвегиядаги ворислик реформасидан сўнг мамлакатнинг биринчи маликаси бўлади. Ундан олдин тахтга ўтирган ягона аёл монарх — XIV асрнинг охирида ҳукмронлик қилган даниялик Маргарет бўлган. Бўлажак малика 2004 йил 21 январда дунёга келган. Ингрид-Александранинг  туғишган укаси Сверредан ташқари Мариус исмли ўгай укаси ҳам бор. У тахтга ворислик қилиш бўйича учинчи ўринда туради.