Самарқанд вилоятининг Ургут туманида 98 ёшли уруш қатнашчисига туғилганлик ҳақида гувоҳнома берилди. Бу ҳақда Давлат хизматлари агентлиги матбуот хизмати хабар берди.
Агентликнинг Самарқанд вилояти бошқармаси Ургут тумани Давлат хизматлари маркази ҳамда 1-сон ФҲДЁ бўлими ходимлари «Испанза» қишлоғида яшовчи, Иккинчи жаҳон уруши қатнашчиси, 98 ёшли Бўрон бобо Гадоевнинг хонадонида бўлиб, отахон ва унинг оила аъзоларига сайёр давлат хизматлари кўрсатган.
«Қарийб юз ёшни қоралаётган отахоннинг шу пайтга қадар туғилганлик тўғрисидаги гувоҳномаси йўқлиги аниқланиб, расмийлаштирилиб берилди. Шунингдек, отахон суҳбат чоғида пенсия миқдори тўғрисида маълумотнома кераклигини билдирди. Марказ ходимлари қисқа фурсатда ушбу мурожаатни рўйхатга олиб, тез фурсатларда маълумотномани тақдим этишди», — дейилади хабарда.
Отахоннинг оила аъзолари хонадон кадастр ҳужжатларида муаммолар борлигини айтиб, бу масалада ёрдам сўраган. Шу куни ушбу масалага ижобий ечим топиш чоралари кўрилган.
Аввалроқ Қашқадарё вилоятининг Деҳқонобод туманида 99 ёшли Иккинчи жаҳон уруши қатнашчисига Президент номидан махсус совға ва 12 миллион сўм пул топширилгани, Бухорода 102 ёшли Иккинчи жаҳон уруши қатнашчисининг таъмирталаб уйи қатор мурожаатларга қарамай, эътиборсиз қолиб келаётгани ҳақида хабар берилган эди.
Изоҳ (0)