Prezident Shavkat Mirziyoyev 3-may kuni yozgi Olimpiya va Paralimpiya o‘yinlariga tayyorgarlik jarayoniga oid taqdimot bilan tanishgandi.
Turizm va sport vazirligining taqdimotida keltirilishicha, Tokio—2020 Olimpiadasiga tayyorgarlik ko‘rish dasturlari uchun jami 62,49 million AQSh dollari miqdoridagi mablag‘ ajratilgan. Solishtirish uchun, bu miqdor Rio—2016 Olimpiya o‘yinlarida 44,12 million dollarni tashkil etgandi.
Ayni vaqtgacha o‘zbekistonlik sportchilar yozgi Olimpiya o‘yinlariga 41 ta, Paralimpiya o‘yinlariga 16 ta yo‘llanma olgan. Ularning har biri 100 million so‘m miqdorida bir martalik pul mukofoti bilan taqdirlangan. Ularning murabbiylari esa 50 million so‘mga ega bo‘lgan.
Shuningdek, taqdimotda Olimpiada va Paralimpiya o‘yinlarida sovrin oladigan sportchilar qay tariqa taqdirlanishi ham ko‘rsatilgan. Unga ko‘ra, yozgi o‘yinlar oltin medaliga ega chiqqan sportchi 200 ming, kumush medal egasi 100 ming, bronzani qo‘lga kiritganlar esa 50 ming dollar pul mukofotiga ega bo‘ladi.
Eslatib o‘tamiz, Rio—2016 o‘yinlarida ham sovrindorlar xuddi shu miqdordagi pul mukofotlari bilan taqdirlangandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)