Ўзбекистонлик спортчиларнинг Токио—2020 Олимпиадасига тайёргарлик кўриши учун 62,5 млн доллар ажратилгани маълум бўлди

Президент Шавкат Мирзиёев 3 май куни ёзги Олимпия ва Паралимпия ўйинларига тайёргарлик жараёнига оид тақдимот билан танишганди.

Туризм ва спорт вазирлигининг тақдимотида келтирилишича, Токио—2020 Олимпиадасига тайёргарлик кўриш дастурлари учун жами 62,49 миллион АҚШ доллари миқдоридаги маблағ ажратилган. Солиштириш учун, бу миқдор Рио—2016 Олимпия ўйинларида 44,12 миллион долларни ташкил этганди.

Айни вақтгача ўзбекистонлик спортчилар ёзги Олимпия ўйинларига 41 та, Паралимпия ўйинларига 16 та йўлланма олган. Уларнинг ҳар бири 100 миллион сўм миқдорида бир марталик пул мукофоти билан тақдирланган. Уларнинг мураббийлари эса 50 миллион сўмга эга бўлган.

Шунингдек, тақдимотда Олимпиада ва Паралимпия ўйинларида соврин оладиган спортчилар қай тариқа тақдирланиши ҳам кўрсатилган. Унга кўра, ёзги ўйинлар олтин медалига эга чиққан спортчи 200 минг, кумуш медал эгаси 100 минг, бронзани қўлга киритганлар эса 50 минг доллар пул мукофотига эга бўлади.

Эслатиб ўтамиз, Рио—2016 ўйинларида ҳам совриндорлар худди шу миқдордаги пул мукофотлари билан тақдирланганди.