Jizzax viloyatining Baxmal tumanida yashovchi ikki nafar homilador ayol shifokor va hamshira mas’uliyatsizligi sabab vafot etdi. Bu haqda viloyat prokuraturasi matbuot xizmati xabar berdi.
Ma’lum bo‘lishicha, homilador E.Z. hamda Z.I. 2020-yilda dispanser nazoratiga olinib, hududga mas’ul patronaj hamshirasi va umumiy amaliyot shifokori tomonidan to‘liq tibbiy ko‘rikdan o‘tkazilmagan. Ularda aniqlangan kasalliklarni o‘z vaqtida davolash choralari ko‘rilmagani oqibatida ayollar 2021-yil aprel oyida Jizzax viloyati perinatal markazida vafot etgan.
Viloyat prokuraturasi tomonidan mutaxassislarni jalb qilgan holda Baxmal tumanida homilador ayollarga ko‘rsatilayotgan tibbiy xizmat holati o‘rganilganda tumanda 2020-yilda 725 nafar homilador ayol kech hisobga olingani, 85 nafari umuman skrining tekshiruvlaridan o‘tkazilmagani aniqlangan.
Shuningdek, birlamchi skrining tekshiruvidan o‘tib, xavf guruhi aniqlangan homiladorlardan irsiy kasalliklarni aniqlash (PAPP) uchun 2020-yil 6 oyi davomida qon namunalari umuman olinmagan.
Tekshirish yakuni bilan viloyat Sog‘liqni saqlash boshqarmasiga taqdimnoma kiritilgan.
Yuqorida qayd qilingan 2 nafar ona o‘limi holati yuzasidan Jizzax shahar prokuraturasi tomonidan tergovga qadar tekshirish harakatlari olib borilmoqda.
Avvalroq Namangandagi tug‘ruqxonadan sog‘ ayolning jasadi chiqqani haqida xabarlar tarqalgandi. Holat prokuratura nazoratiga olingan.
Izoh (0)