Toshkentda tadbirkor faoliyatida kameral soliq tekshiruvini noqonuniy o‘tkazgan davlat katta soliq inspektori jarimaga tortildi. Bu haqda biznes-ombudsman matbuot xizmati xabar berdi.
Ma’lum qilinishicha, “Business” MChJning (nomi o‘zgartirilgan) murojaati asosida Toshkent shahar DSB xodimi tomonidan o‘tkazilgan tekshiruvning qonuniyligi o‘rganilgan.
Davlat katta soliq inspektori S.D. (ismi o‘zgartirilgan) 2016-yil 1-yanvardan 2020-yil 1-oktabrga qadar bo‘lgan davr uchun ushbu korxona faoliyatida tegishli tartibda attestatsiyadan o‘tmasdan va maxsus guvohnomaga olmasdan kameral soliq tekshiruvi o‘tkazgan.
“Xo‘jalik yurituvchi subyektlar faoliyatini davlat tomonidan nazorat qilish to‘g‘risida”gi qonunga muvofiq, nazorat qiluvchi organlar mansabdor shaxslarining xo‘jalik yurituvchi subyektlar faoliyatini tekshirishiga tekshirishlarni o‘tkazishga ruxsat berilganligi to‘g‘risidagi maxsus guvohnoma, shaxsiy guvohnoma mavjud bo‘lgan taqdirda yo‘l qo‘yilishi belgilangan.
Ushbu holat bo‘yicha biznes-ombudsmanning mas’ul xodimi aybdor soliq inspektoriga nisbatan ma’muriy huquqbuzarlik to‘g‘risidagi bayonnomani rasmiylashtirib, sudga yuborgan.
Jinoyat ishlari bo‘yicha Shayxontohur tuman sudining qaroriga ko‘ra, soliq organi xodimi S.D. huquqbuzar deb tan olingan va unga nisbatan bazaviy hisoblash miqdorining 10 baravari (3-may holatiga ko‘ra, 2 million 450 ming so‘m) miqdorida jarima jazosi qo‘llanilgan.
Izoh (0)