Тошкентда тадбиркор фаолиятида камерал солиқ текширувини ноқонуний ўтказган давлат катта солиқ инспектори жаримага тортилди. Бу ҳақда бизнес-омбудсман матбуот хизмати хабар берди.
Маълум қилинишича, «Business» МЧЖнинг (номи ўзгартирилган) мурожаати асосида Тошкент шаҳар ДСБ ходими томонидан ўтказилган текширувнинг қонунийлиги ўрганилган.
Давлат катта солиқ инспектори С.Д. (исми ўзгартирилган) 2016 йил 1 январдан 2020 йил 1 октябрга қадар бўлган давр учун ушбу корхона фаолиятида тегишли тартибда аттестациядан ўтмасдан ва махсус гувоҳномага олмасдан камерал солиқ текшируви ўтказган.
«Хўжалик юритувчи субъектлар фаолиятини давлат томонидан назорат қилиш тўғрисида»ги қонунга мувофиқ, назорат қилувчи органлар мансабдор шахсларининг хўжалик юритувчи субъектлар фаолиятини текширишига текширишларни ўтказишга рухсат берилганлиги тўғрисидаги махсус гувоҳнома, шахсий гувоҳнома мавжуд бўлган тақдирда йўл қўйилиши белгиланган.
Ушбу ҳолат бўйича бизнес-омбудсманнинг масъул ходими айбдор солиқ инспекторига нисбатан маъмурий ҳуқуқбузарлик тўғрисидаги баённомани расмийлаштириб, судга юборган.
Жиноят ишлари бўйича Шайхонтоҳур туман судининг қарорига кўра, солиқ органи ходими С.Д. ҳуқуқбузар деб тан олинган ва унга нисбатан базавий ҳисоблаш миқдорининг 10 баравари (3 май ҳолатига кўра, 2 миллион 450 минг сўм) миқдорида жарима жазоси қўлланилган.
Изоҳ (0)