Namanganda 96 ta xonadon joylashgan to‘rtta ko‘p qavatli uy tomiga umumiy quvvati 58 kilovatt bo‘lgan quyosh panellari o‘rnatildi, deb xabar bermoqda Energetika vazirligi matbuot xizmati.
Ma’lum qilinishicha, loyiha Sun-Hightech MChJ tomonidan BMTning PROON/GEF loyihasi yordamida O‘zbekiston Qurilish vazirligi bilan birgalikda “O‘zbekiston Respublikasi qishloq joylarida energiya tejamkor uy-joy qurilishini rivojlantirishga ko‘maklashish” dasturi doirasida amalga oshirildi.
Uychi tumanidagi to‘rt qavatli yangi uylarga jami 192 ta quyosh panellari o‘rnatilgan. Mazkur quyosh elektr stansiyalari xonadonlardagi maishiy texnikalar, jumladan, yoritish chiroqlari, televizor, muzlatkich, kompyuter kabi elektr jihozlarini markaziy elektr ta’minotidan alohida, mustaqil (avtonom) ravishda ta’minlash imkonini beradi.
Ushbu quyosh elektr stansiyalariga uzluksiz ravishda texnik xizmat ko‘rsatish maqsadida mazkur ko‘p qavatli uylarda yashovchi yosh mutaxassis doimiy ravishda ishga qabul qilingan.
BMT tomonidan amalga oshirilayotgan 1 milliard 320 million so‘mlik ushbu grant loyiha doirasida O‘zbekistonning 5 ta hududi qamrab olinadi. Jumladan, Namangan viloyatidan tashqari, Qoraqalpog‘iston Respublikasi, Toshkent, Buxoro va Qashqadaryo viloyatlarida ham quyosh panellari o‘rnatiladi.
Eslatib o‘tamiz, Shavkat Mirziyoyev 2020-yilning may oyida o‘tkazilgan yig‘ilishda qayta tiklanuvchi energiya manbalari O‘zbekistonda hali to‘la foydalanilmayotgan ulkan rezervlardan biri ekanligini aytgandi.
“Albatta, bu yo‘nalish boshida katta xarajat talab qiladi. Lekin bu kelajakda tabiiy gaz va neft tanqisligini hal qilish, iste’molchilar uchun esa sarf-xarajatlarni kamida 2 barobar tejash imkonini bersa, o‘zini oqlaydi. Misol uchun, agar 150 mingta xonadonga quyosh panellari va suv isitish tizimlari o‘rnatilsa, yiliga 319 million kub metr tabiiy gazni tejasa bo‘ladi”, — degan edi Prezident.
2020-yilning yanvarida Rossiyaning “Renova” kompaniyalar guruhi O‘zbekistonda quyosh panellari ishlab chiqarish bo‘yicha qo‘shma korxona tuzishni taklif qilgandi.
Izoh (0)