O‘zbekistonda kitob ishlab chiqaruvchi nashriyotlarga 15 foiz qo‘shilgan qiymat solig‘i qo‘llanishi rejalashtirilayotgani haqida xabarlar tarqaldi. Shu munosabat bilan Oliy Majlis Senati Moliya vazirligi va Davlat soliq qo‘mitasiga so‘rov yubordi.
Senator Odiljon Iminovning ta’kidlashicha, kitob ishlab chiqarish sohasining, ya’ni noshirlar va bosmaxonalar uchun soliq imtiyozlarining bekor qilinishi, ularga nisbatan qo‘shilgan qiymat solig‘ining qo‘llanishi aksariyat ishlab chiqaruvchilarni rasmiy faoliyat yuritishdan chetlashib, o‘g‘rincha (kontrafakt) mahsulotlar ishlab chiqarishga “undamoqda”.
Natijada “yashirin iqtisodiyot” rivojlanib, qonuniy faoliyat yuritayotganlarning salmog‘i kamayib bormoqda, ya’ni sohada iqtisodiy nosog‘lom muhit tarkib topmoqda.
Shuningdek, soha vakillaridan kelgan murojaatlarda kitob ishlab chiqarishga nisbatan tabaqalashtirilgan qo‘shilgan qiymat solig‘i stavkasini qo‘llash taklif etilmoqda. Jumladan, kitob ishlab chiqarish sanoatiga umumiyga nisbatan Rossiyada 50 foiz, Germaniyada 36 foiz, Fransiyada 28 foiz, Buyuk Britaniyada esa “nol” foiz qo‘shilgan qiymat solig‘i stavkasi qo‘llanilishi ta’kidlangan. Ya’ni, mazkur davlatlarda kitob ishlab chiqarish sohasi uchun qo‘shilgan qiymat solig‘i stavkasi kamida ikki barobarga pasaytirilgan.
Yuqoridagilardan kelib chiqib, Oliy Majlis Senati Fan, ta’lim va sog‘liqni saqlash masalalari qo‘mitasi tomonidan O‘zbekiston Moliya vazirligi hamda Davlat soliq qo‘mitasiga kitob savdosi korxonalariga qo‘shilgan qiymat solig‘i bo‘yicha tabaqalashtirilgan stavkalarni qo‘llash, shuningdek, sohani manzilli subsidiyalar orqali qo‘llab-quvvatlash yuzasidan so‘rov yuborildi.
Mavzuga doir:
- Senat o‘simlik yog‘i importiga QQSni bekor qilishni ma’qulladi
- O‘zbekistonda “obnal firmalar” faoliyati bilan bog‘liq sud jarayonlarida soliq qo‘mitasi xatti-harakatlari qonuniyligi isbotlanmoqda
- O‘zbekistonda “parkovka” qoidalarini buzganlik uchun solinadigan jarima miqdorini kamaytirish Senat tomonidan ma’qullandi
Izoh (0)