Сенат китоб ишлаб чиқариш соҳаси масаласида Молия вазирлиги ва Давлат солиқ қўмитасига сўров юборди

Ўзбекистонда китоб ишлаб чиқарувчи нашриётларга 15 фоиз қўшилган қиймат солиғи қўлланиши режалаштирилаётгани ҳақида хабарлар тарқалди. Шу муносабат билан Олий Мажлис Сенати Молия вазирлиги ва Давлат солиқ қўмитасига сўров юборди.

Сенатор Одилжон Иминовнинг таъкидлашича, китоб ишлаб чиқариш соҳасининг, яъни ноширлар ва босмахоналар учун солиқ имтиёзларининг бекор қилиниши, уларга нисбатан қўшилган қиймат солиғининг қўлланиши аксарият ишлаб чиқарувчиларни расмий фаолият юритишдан четлашиб, ўғринча (контрафакт) маҳсулотлар ишлаб чиқаришга «ундамоқда».

Натижада «яширин иқтисодиёт» ривожланиб, қонуний фаолият юритаётганларнинг салмоғи камайиб бормоқда, яъни соҳада иқтисодий носоғлом муҳит таркиб топмоқда.

Шунингдек, соҳа вакилларидан келган мурожаатларда китоб ишлаб чиқаришга нисбатан табақалаштирилган қўшилган қиймат солиғи ставкасини қўллаш таклиф этилмоқда. Жумладан, китоб ишлаб чиқариш саноатига умумийга нисбатан Россияда 50 фоиз, Германияда 36 фоиз, Францияда 28 фоиз, Буюк Британияда эса «ноль» фоиз қўшилган қиймат солиғи ставкаси қўлланилиши таъкидланган. Яъни, мазкур давлатларда китоб ишлаб чиқариш соҳаси учун қўшилган қиймат солиғи ставкаси камида икки баробарга пасайтирилган.

Юқоридагилардан келиб чиқиб, Олий Мажлис Сенати Фан, таълим ва соғлиқни сақлаш масалалари қўмитаси томонидан Ўзбекистон Молия вазирлиги ҳамда Давлат солиқ қўмитасига китоб савдоси корхоналарига қўшилган қиймат солиғи бўйича табақалаштирилган ставкаларни қўллаш, шунингдек, соҳани манзилли субсидиялар орқали қўллаб-қувватлаш юзасидан сўров юборилди.