Oliy Majlis Senati 24-aprel kuni bo‘lib o‘tgan yalpi majlisda Ma’muriy javobgarlik to‘g‘risidagi kodeksga ayrim yo‘l harakati qoidalarini buzganlik uchun jarima miqdorini kamaytirishni nazarda tutuvchi o‘zgartirishlar kiritish to‘g‘risidagi qonunni ma’qulladi, deb xabar bermoqda “Gazeta.uz”.
Ma’muriy javobgarlik to‘g‘risidagi kodeksga kiritilgan o‘zgartishlarga ko‘ra, 128-6-moddasi (transport vositalari haydovchilari tomonidan to‘xtash yoki to‘xtab turish qoidalarini buzganlik)ni buzganlik uchun jarima miqdori BHMning 3 baravaridan 2 baravariga qisqarmoqda. Bundan tashqari, qonundan 2, 3 va 4-qismlar chiqarib tashlandi, ya’ni qonunbuzarlik holati takroran (ikki, uch yoki undan ortiq) sodir etilishi bilan (BHMning 3 baravaridan 15 baravarigacha) ortib boruvchi “jarimalar zanjiri” bekor qilinadi. Endi (qonunni hali Prezident ham imzolashi kerak) yagona — BHMning 2 baravari miqdorida (490 ming so‘m) jarima bo‘ladi.
Qonun bilan, shuningdek, ayrim yo‘l harakati qoidalarini buzganlik uchun jarimalar miqdori ham birlashtirildi, chunki tuzatishlarni ishlab chiquvchilar ta’kidlaganidek, kodeksda jarimalarning “eng kam” va “eng ko‘p” miqdorda belgilangani “korrupsion holatlarning kelib chiqishiga imkoniyat yaratayotgan edi”.
Ma’muriy javobgarlik to‘g‘risidagi kodeksdagi 123-modda (transport vositalaridan axlat yoki boshqa narsalarni tashlash)dagi jarima miqdoridagi “beshdan bir qismidan bir baravarigacha” degan so‘zlar “ikkidan bir qismi miqdorida” degan so‘zlar bilan almashtirilmoqda.
137-modda (yo‘l-transport hodisasi qatnashchilarining belgilangan qoidalarni buzgan holda hodisa yuz bergan joydan ketib qolishi) esa quyidagi tahrirda bayon etilmoqda:
“Yo‘l-transport hodisasi qatnashchilarining belgilangan qoidalarni buzgan holda hodisa yuz bergan joydan ketib qolishi bazaviy hisoblash miqdorining 15 baravari miqdorida jarima solishga sabab bo‘ladi.
Yo‘l-transport hodisasi qatnashchilarining belgilangan qoidalarni buzgan holda hodisa yuz bergan joydan ketib qolishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelsa, BHMning 30 baravari miqdorida jarima solishga yoki transport vositalarini boshqarish huquqidan 1 yil muddatga mahrum etishga yoxud 15 sutkagacha muddatga ma’muriy qamoqqa olishga sabab bo‘ladi”.
Amaldagi Ma’muriy javobgarlik to‘g‘risidagi kodeksda 137-modda bir qismdan iborat bo‘lib, unda 30 BHM miqdorida jarima yoki transport vositalarini boshqarish huquqidan 2 yil muddatga mahrum qilish yoki 15 kun muddatga ma’muriy qamoqqa olish ko‘zda tutilgan.
141-modda (transport vositalaridan shaxsiy boylik orttirish maqsadida foydalanish)ni buzganlik uchun jarima miqdori ham o‘zgartirilmoqda — “BHMning 2 baravaridan 5 baravarigacha” miqdor o‘rniga BHMning 2 baravari miqdorida yagona jarima joriy etilmoqda.
147-modda birinchi qismida (yo‘llarga, yo‘l inshootlariga, yo‘l harakatini tartibga solib turuvchi texnik vositalarga shikast yetkazish, ularni saqlash qoidalarini buzish)gi jarima BHMning 1−3 baravaridan BHMning 2 baravarigacha miqdorga o‘zgaradi.
Bundan tashqari, 54-moddaning 2-qismi (epidemiyaga qarshi kurashish qoidalarini buzish) uchun jazo yengillashtirilmoqda — fuqarolarga BHMning 20 baravari, mansabdor shaxslarga esa — 30 baravari miqdorida jarima solinadi.
Eslatib o‘tamiz, 2020-yilning sentabrida O‘zbekistonda avtomobilning sug‘urtasi yo‘qligi uchun jarima maydonchasiga joylashtirish amaliyoti bekor qilingan edi.
Izoh (0)