Олий Мажлис Сенати 24 апрель куни бўлиб ўтган ялпи мажлисда Маъмурий жавобгарлик тўғрисидаги кодексга айрим йўл ҳаракати қоидаларини бузганлик учун жарима миқдорини камайтиришни назарда тутувчи ўзгартиришлар киритиш тўғрисидаги қонунни маъқуллади, деб хабар бермоқда «Gazeta.uz».
Маъмурий жавобгарлик тўғрисидаги кодексга киритилган ўзгартишларга кўра, 128-6-моддаси (транспорт воситалари ҳайдовчилари томонидан тўхташ ёки тўхтаб туриш қоидаларини бузганлик)ни бузганлик учун жарима миқдори БҲМнинг 3 бараваридан 2 бараварига қисқармоқда. Бундан ташқари, қонундан 2, 3 ва 4-қисмлар чиқариб ташланди, яъни қонунбузарлик ҳолати такроран (икки, уч ёки ундан ортиқ) содир этилиши билан (БҲМнинг 3 бараваридан 15 бараваригача) ортиб борувчи «жарималар занжири» бекор қилинади. Энди (қонунни ҳали Президент ҳам имзолаши керак) ягона — БҲМнинг 2 баравари миқдорида (490 минг сўм) жарима бўлади.
Қонун билан, шунингдек, айрим йўл ҳаракати қоидаларини бузганлик учун жарималар миқдори ҳам бирлаштирилди, чунки тузатишларни ишлаб чиқувчилар таъкидлаганидек, кодексда жарималарнинг «энг кам» ва «энг кўп» миқдорда белгилангани «коррупцион ҳолатларнинг келиб чиқишига имконият яратаётган эди».
Маъмурий жавобгарлик тўғрисидаги кодексдаги 123-модда (транспорт воситаларидан ахлат ёки бошқа нарсаларни ташлаш)даги жарима миқдоридаги «бешдан бир қисмидан бир бараваригача» деган сўзлар «иккидан бир қисми миқдорида» деган сўзлар билан алмаштирилмоқда.
137-модда (йўл-транспорт ҳодисаси қатнашчиларининг белгиланган қоидаларни бузган ҳолда ҳодиса юз берган жойдан кетиб қолиши) эса қуйидаги таҳрирда баён этилмоқда:
«Йўл-транспорт ҳодисаси қатнашчиларининг белгиланган қоидаларни бузган ҳолда ҳодиса юз берган жойдан кетиб қолиши базавий ҳисоблаш миқдорининг 15 баравари миқдорида жарима солишга сабаб бўлади.
Йўл-транспорт ҳодисаси қатнашчиларининг белгиланган қоидаларни бузган ҳолда ҳодиса юз берган жойдан кетиб қолиши жабрланувчига енгил тан жароҳати ёки анча миқдорда моддий зарар етказилишига олиб келса, БҲМнинг 30 баравари миқдорида жарима солишга ёки транспорт воситаларини бошқариш ҳуқуқидан 1 йил муддатга маҳрум этишга ёхуд 15 суткагача муддатга маъмурий қамоққа олишга сабаб бўлади».
Амалдаги Маъмурий жавобгарлик тўғрисидаги кодексда 137-модда бир қисмдан иборат бўлиб, унда 30 БҲМ миқдорида жарима ёки транспорт воситаларини бошқариш ҳуқуқидан 2 йил муддатга маҳрум қилиш ёки 15 кун муддатга маъмурий қамоққа олиш кўзда тутилган.
141-модда (транспорт воситаларидан шахсий бойлик орттириш мақсадида фойдаланиш)ни бузганлик учун жарима миқдори ҳам ўзгартирилмоқда — «БҲМнинг 2 бараваридан 5 бараваригача» миқдор ўрнига БҲМнинг 2 баравари миқдорида ягона жарима жорий этилмоқда.
147-модда биринчи қисмида (йўлларга, йўл иншоотларига, йўл ҳаракатини тартибга солиб турувчи техник воситаларга шикаст етказиш, уларни сақлаш қоидаларини бузиш)ги жарима БҲМнинг 1−3 бараваридан БҲМнинг 2 бараваригача миқдорга ўзгаради.
Бундан ташқари, 54-модданинг 2-қисми (эпидемияга қарши курашиш қоидаларини бузиш) учун жазо енгиллаштирилмоқда — фуқароларга БҲМнинг 20 баравари, мансабдор шахсларга эса — 30 баравари миқдорида жарима солинади.
Эслатиб ўтамиз, 2020 йилнинг сентябрида Ўзбекистонда автомобилнинг суғуртаси йўқлиги учун жарима майдончасига жойлаштириш амалиёти бекор қилинган эди.
Изоҳ (0)