O‘zbekiston koronavirus pandemiyasi oqibatida yuzaga kelgan inqiroz yumshagan bir paytda barqaror iqtisodiy o‘sishga erishish uchun tarkibiy islohotlarni jadallashtirishi kerak. Bu haqda Xalqaro valyuta jamg‘armasi (XVJ) ekspertlarining 25-yanvardan 17-fevralga qadar o‘tkazilgan virtual missiyasi yakuniga oid bayonotida ma’lum qilingan, deb yozadi “Gazeta.uz”.
“Uzoq yillik nisbatan izolyatsiya va hukumatning qattiq nazoratidan so‘ng, O‘zbekiston o‘z iqtisodiyotini modernizatsiya qilishda katta yutuqlarga erishdi. Biroq islohotlar dasturi oldingidek keng ko‘lamli, iqtisod esa o‘sib borayotgan aholi uchun yetarlicha ish o‘rinini yaratmayapti”, — deyiladi bayonotda.
XVJ O‘zbekistonga davlatning iqtisodiyotdagi “hamon katta bo‘lgan rolini” kamaytirishni va xususiy sektorning o‘sishiga yordam beradigan muhit yaratishni maslahat beradi.
“Yaxshi ishlovchi va adolatli bozor iqtisodiyoti uchun zarur bo‘lgan kuchli hamda mustaqil institutlarni yaratish, shuningdek, siyosatning barqarorligi va uning rivojini oldindan ko‘ra bilish imkoniyatlarining oshishi alohida muhim ahamiyatga ega”, — deyiladi xabarda.
XVJning fikricha, koronavirus pandemiyasi O‘zbekiston aholisi va iqtisodiyotiga nisbatan qisqa muddatli salbiy ta’sir ko‘rsatdi, bunga hukumatning “o‘z vaqtidagi hal qiluvchi” choralari ko‘maklashgan. Ekspertlarning hisoblashicha, bu O‘zbekistonga 2020-yilda iqtisodiyot borasida ijobiy o‘sishni namoyon etgan kam sonli davlatlardan biriga aylanishiga yordam bergan.
Xalqaro valyuta jamg‘armasi 2021-yilda iqtisodiy o‘sish 5 foiz atrofida, yillik inflyatsiya esa 10 foizdan kamroq bo‘lishini prognoz qilmoqda.
Shu bilan birga, ekspertlarning ta’kidlashicha, “noaniqlik darajasi hamon yuqoriligicha qolmoqda”. Iqtisodiyotning qayta tiklanishi ko‘p jihatdan vaksinatsiya jarayoniga, shuningdek, O‘zbekistonning asosiy savdo sheriklarini rivojlanishiga bog‘liq bo‘ladi.
Mavzuga doir:
Izoh (0)