O‘zbekistonda nechta bog‘cha tarbiyachisi va tarbiyalanuvchisi koronavirus yuqtirib olgani haqida ma’lumot berildi
O‘zbekistonda maktabgacha ta’lim tashkilotlarida 2021-yil 25-aprel holatiga ko‘ra koronavirus infeksiyasi qayd etilgan xodimlar soni 36 nafarga yetdi. Bu haqda Maktabgacha ta’lim vazirligi axborot xizmati rahbari Mavluda Asqarxo‘jayeva AOKAda o‘tkazilgan brifingda ma’lum qildi.
Qayd etilishicha, maktabgacha ta’lim yoshidagi bolalar orasida 42 ta tarbiyalanuvchida kasallanish alomatlari aniqlangan, 11 ta maktabgacha ta’lim tashkiloti 14 kunlik onlayn rejimda o‘z faoliyatini davom ettirmoqda.
Toshkent shahrida 25 ta tarbiyalanuvchi va 28 ta xodim davolanmoqda. Toshkent shahridagi maktabgacha ta’lim tashkilotlaridan 8 tasi 14 kunlik onlayn rejimga o‘tdi. Toshkent viloyatida 9 nafar tarbiyalanuvchi, 9 nafar xodim davolanmoqda. 4 ta maktabgacha ta’lim tashkiloti 14 kunlik onlayn rejimda ishlamoqda.
Samarqand shahrida 4 nafar tarbiyalanuvchi va 2 nafar tarbiyachida koronavirus aniqlangan. Tashkilotlarda koronavirus infeksiyasi aniqlangani sababli 27-apreldan boshlab Samarqand shahridagi barcha maktabgacha ta’lim tashkilotlarida 14 kunlik karantin joriy etildi.
Mavzuga doir: “Pishgan ovqatga solingan xom go‘sht, sariyog‘ o‘rniga ‘Spred’ ” — Samarqanddagi bog‘chalarda qator qonunbuzarliklar aniqlandi
Navoiy viloyatida 2 nafar MTM xodimida kasallik aniqlangan, bog‘cha 14 kunlik masofaviy ta’lim va tarbiya berish rejimiga o‘tkazildi. Xorazm viloyati Hazorasp tumani Maktabgacha ta’lim bo‘limi xodimlaridan birida ham kasallik aniqlangan.
Bundan avval Samarqanddagi 4 ta MTT tarbiyalanuvchilari va tarbiyachilarida koronavirus kasalligi aniqlangani, Namangandagi bog‘cha tarbiyalanuvchisi issiq suvdan kuyib vafot etishi ortidan MTT direktori va bir necha xodim ishdan bo‘shatilgani hamda O‘zbekistonda 6,5 milliondan ortiq bolalar ommaviy degelmintizatsiya tadbirlariga jalb qilinishi haqida xabar berilgandi.
