Slovakiya bosh vaziri Eduard Heger uch nafar rossiyalik diplomatning mamlakat hududidan chiqarib yuborilishini e’lon qildi. Bu haqda “TAZ” xabar berdi.
“Slovakiya uch nafar rossiyalik diplomatni o‘z hududidan chiqarib yuboradi. Ular respublika hududini yaqin uch kun ichida tark etishi zarur”, — degan bosh vazir.
Shuningdek, u hukumatning mazkur qarorni qabul qilishdan avval maxsus xizmatlar bergan axborotlarni diqqat bilan o‘rganib chiqqanini qayd etgan.
Avval Chexiya Pragadagi Moskvaning diplomatik vakolatxonasida Rossiyada qancha chexiyalik diplomat qolgan bo‘lsa, shuncha xodim qoldirishini ma’lum qilgandi. Ayni vaqtda Pragadagi Rossiya elchixonasida 27 nafar diplomat va 67 nafar texnik xodim faoliyat olib boradi, Rossiyadagi Chexiya elchixonasida esa 5 nafar diplomat va 19 nafar texnik xodim ishlaydi.
Mazkur qarorga dastlab Chexiyaning 18 nafar rossiyalik diplomatni o‘z hududidan chiqarib yuborgani, keyinchalik Rossiyaning javob harakati bilan 20 nafar chexiyalik diplomat o‘z yurtiga jo‘natilgani sabab bo‘lgan.
Rossiyaning tashqi siyosatida Polsha, AQSh va Bolgariya bilan munosabatlarda ham keskinlik hukm surmoqda. Mart oyi oxirida Bolgariyada ikki nafar rossiyalik diplomat josuslikda gumon qilinib, Rossiyaga qaytarib yuborilgach, Rossiya ham ikki nafar bolgariyalik diplomatni mamlakatdan chiqarib yuborgan.
Izoh (0)