Словакия бош вазири Эдуард Ҳегер уч нафар россиялик дипломатнинг мамлакат ҳудудидан чиқариб юборилишини эълон қилди. Бу ҳақда «ТАЗ» хабар берди.
«Словакия уч нафар россиялик дипломатни ўз ҳудудидан чиқариб юборади. Улар республика ҳудудини яқин уч кун ичида тарк этиши зарур», — деган бош вазир.
Шунингдек, у ҳукуматнинг мазкур қарорни қабул қилишдан аввал махсус хизматлар берган ахборотларни диққат билан ўрганиб чиққанини қайд этган.
Аввал Чехия Прагадаги Москванинг дипломатик ваколатхонасида Россияда қанча чехиялик дипломат қолган бўлса, шунча ходим қолдиришини маълум қилганди. Айни вақтда Прагадаги Россия элчихонасида 27 нафар дипломат ва 67 нафар техник ходим фаолият олиб боради, Россиядаги Чехия элчихонасида эса 5 нафар дипломат ва 19 нафар техник ходим ишлайди.
Мазкур қарорга дастлаб Чехиянинг 18 нафар россиялик дипломатни ўз ҳудудидан чиқариб юборгани, кейинчалик Россиянинг жавоб ҳаракати билан 20 нафар чехиялик дипломат ўз юртига жўнатилгани сабаб бўлган.
Россиянинг ташқи сиёсатида Польша, АҚШ ва Болгария билан муносабатларда ҳам кескинлик ҳукм сурмоқда. Март ойи охирида Болгарияда икки нафар россиялик дипломат жосусликда гумон қилиниб, Россияга қайтариб юборилгач, Россия ҳам икки нафар болгариялик дипломатни мамлакатдан чиқариб юборган.
Изоҳ (0)