Rossiya hududidan o‘tuvchi Amur daryosida muz siljishi paytida ko‘tarilgan ulkan muz bo‘laklari Xabarovskdagi Utes posyolkasi qirg‘og‘iga chiqib, temirbeton panjarani buzib tashladi. Bu haqda “Interfaks” xabar berdi.
Xabarga ko‘ra, hodisa qirg‘oq bo‘yida yurgan mahalliy aholi guvohligida yuz bergan. Muz bo‘laklari piyodalar yo‘lagi bo‘ylab yoyilgan. Dastlabki ma’lumotlarga ko‘ra, jabrlanganlar yo‘q.
Xabarovskda aprel oyi oxiri uchun g‘ayritabiiy iliq ob-havo prognoz qilinmoqda. Havo harorati selsiy bo‘yicha 23 darajagacha isiydi. Bir necha kun oldin daryo deyarli butunlay muzdan tozalandi, ammo vaqti-vaqti bilan Amurning yuqori qismidan muz oqib kelishi davom etmoqda. Bundan tashqari, Utes yaqinidagi qirg‘oqda muzlar to‘planib qolgan.
Uzoq Sharq gidrometeorologiya markazi xodimi Natalya Efremovaning so‘zlariga ko‘ra, qish qorsiz kelgani va suv sathi yuqori bo‘lgani sababli Amur qirg‘og‘iga muz chiqadi. “Bu yil Amur sathi me’yordan 4 metr yuqori, odatdagi balandligi esa 1,5 ga teng. Shu va qorning ozligi tufayli daryo suvi 1,5 metr chuqurlikda muzlab qoldi”, — dedi u.
Xabarovsk o‘lkasining prokuraturasi qirg‘oq yuzasiga muz massalarining chiqishi, to‘siqlarning buzilishi hamda aholi hayoti va sog‘lig‘iga tahdid paydo bo‘lishi munosabati bilan tekshiruv o‘tkazishni ma’lum qildi.
Izoh (0)