“Barselona” Yevropa Superligasidan chiqmasligini ma’lum qildi

“Barselona” futbol klubi Yevropa Superligasi borasida rasmiy bayonot bilan chiqdi.

Unga ko‘ra, katalon klubi loyihani tark etishga asos yo‘qligi va qonun ular tomonida ekanini ma’lum qilgan.

“Barselona” Yevropaning ko‘plab yirik klublari fikrini inobatga oladi. Klub sifatni oshirish evaziga moliyaviy barqarorlik va dunyo futboli mavjudligini saqlab qolish mumkinligiga ishonadi.

“Barselona” direktorlar kengashi Superliga ta’sischilari qatoriga kirish qarorini qabul qildi. Bu futbol muxlislariga taklif qilingan sifatli va e’tibor tortuvchan mahsulot. Bu loyiha ta’sischilari qatorida bo‘lishdan bosh tortishlik tarixiy xato bo‘lardi, shu sabab unga qo‘shilish qarori qabul qilindi.

“Barselona” jamoatchilikning ushbu loyihaga bo‘lgan reaksiyasini inobatga olgan holda, uni chuqur tahlil qilish, kerak bo‘lsa ma’lum o‘zgartirishlar kiritish lozim deb hisoblaydi. Bunday chuqur tahlil keyinchalik shoshqaloq harakatlarni amalga oshirmaslik uchun vaqt va sovuqqonlik talab qiladi.

Biz shuni alohida ta’kidlab o‘tmoqchimiz, sud Superliga ta’sischi klublari uchun huquqiy himoyani taqdim etdi. Shu bois “Barselona” debatlar jarayonida asossiz bosim va qo‘rqitishlar bo‘lishi noto‘g‘ri deb hisoblaydi.

“Barselona” ushbu masala yuzasidan paydo bo‘lgan savollarni muhimligini inobatga olgan holda o‘z muxlislari va jamoatchilikni tushunish, hurmat hamda sabrga chaqiradi.

“Barselona” bayonoti

Ma’lumot uchun, 18-aprel kuni 12 klub boshchiligida Yevropa Superligasiga asos solindi. Oradan ikki kun o‘tib APLning olti klubi loyihani tark etdi. Uning ortidan “Milan”, “Inter”, “Atletiko”, “Yuventus” jamoalari ham a’zolikdan chiqishini e’lon qildi va Superliga loyihasi vaqtincha to‘xtatildi. Ayni damda faqat “Real” va “Barselona” loyihadan voz kechmadi.