Toshkent shahar hokimligi tashabbusi bilan tashkil etilayotgan “Toshkent Besh tashabbus harakati” tadbirlariga ro‘yxatga olish jarayoni 26-mart kuni boshlangan edi. Festival tashkilotchilarining “Daryo”ga ma’lum qilishicha, asosiy tadbirlar 21-maydan 25-mayga qadar bo‘lib o‘tadi.
Hozirgacha 10 300 ga yaqin kishi “Toshkent Besh tashabbus harakati” tadbirlarida ishtirok etish uchun ro‘yxatdan o‘tdi — 16 yoshdan 30 yoshgacha bo‘lgan 7 200 nafar yigit-qiz mehmon sifatida qatnashish istagini bildirgan bo‘lsa, haftalik doirasidagi tadbirlarda ishtirokchi sifatida ro‘yxatdan o‘tganlar soni salkam 3 mingga yetdi.
“Toshkent Besh tashabbus harakati”da ishtirokchi sifatida ro‘yxatdan o‘tgan minglab yoshlar madaniyat, san’at, sport, axborot texnologiyalari, mutolaa va tadbirkorlik yo‘nalishlari bo‘yicha musobaqalarda sovrinli o‘rinlar uchun kurashadi.
Masalan, birgina futbol turnirida qatnashish uchun o‘rtacha olti-yetti kishidan iborat 155 jamoa ro‘yxatdan o‘tgan — bu 1000 ga yaqin yosh futbolchi degani! Basketbol turnirida qatnashuvchilar soni ham 100 nafardan oshgan.
“X loyihasi” g‘oyalar tanlovida hozircha 45 kishi o‘z AyTi-qobiliyatlarini namoyon etish istagini bildirgan. Jamoalardan Toshkentni rivojlantirishga oid loyihalarni taqdim etish talab etilgan Ayollar netvorkingi haftaligida kamida 50 nafar qiz qatnashmoqchi.
Tadbir doirasidagi tanlovlar orasida yoshlar e’tiborini eng ko‘p “Zakovat” intellektual bahsi o‘ziga tortmoqda — hozircha unda 1860 kishi o‘z bilimlarini namoyon etishga bel bog‘lagan. Biroq bu hali yakuniy raqamlar emas — ro‘yxatga olish hali tugagani yo‘q.
Izoh (0)