2022—2023-yillarda yirik olim va faylasuf Abu Rayhon Beruniy tavalludining 1050-yilligi YuNESKO ishtirokida keng nishonlanadi. Bu haqda 7—21-aprel kunlari tashkilotning onlayn ravishda bo‘lib o‘tgan 211-sessiyasida bosh vazir o‘rinbosari, YuNESKO ishlari bo‘yicha O‘zbekiston Milliy komissiyasi a’zosi Aziz Abduhakimov ma’lum qildi, deb yozadi “Gazeta.uz”.
“Ushbu taklif O‘zbekiston tashabbusi bilan Tojikiston, Eron va Turkiya davlatlari yordamida ishlab chiqilgan. Endi esa mazkur masala 2021-yilning noyabrida Parij shahrida bo‘lib o‘tadigan YuNESKO bosh anjumani 41-yig‘ilishida tasdiqlash uchun kiritiladi”, — deydi bosh vazir o‘rinbosari.
“Abu Rayhon Muhammad ibn Ahmad Beruniy o‘rta asrlarning buyuk qomusiy olimi, astronom, matematik, faylasuf, geograf, etnograf, antropolog, geolog, tarixchi, botanik, farmakolog va gumanisti bo‘lgan”, — deyiladi kengash ko‘rib chiqqan arizada.
Beruniy 973-yilning 4-sentabrida Xorazmning qadimiy poytaxti — Katda (hozirda Qoraqalpog‘istonning Beruniy shahri) tug‘ilgan va matematikaning hamda astronomiyaning rivojlanishiga ulkan hissa qo‘shgan.
Beruniy aniq, tabiiy va gumanitar fanlarning deyarli barcha sohalariga tegishli bo‘lgan 150 ga yaqin asar yaratib, buyuk ilmiy meros qoldirgan. Uning ishlari ko‘plab tillarga tarjima qilingan va hozirda ham foydalanib kelinmoqda.
“Beruniy, shuningdek, turli xil taqvim tizimlari, hukmdorlar, qahramonlar tarixi, siyosiy voqealar, madaniyat, urf-odatlar va axloq qoidalari bo‘yicha tadqiqotlar olib borgan madaniyatlararo tarixchi sifatida tanilgan”, — deyiladi xabarda.
Eslatib o‘tamiz, 2018-yilda Qoraqalpog‘istonda Abu Rayhon Beruniyning 1045 yilligiga bag‘ishlangan ilmiy–nazariy konferensiyasi o‘tkazilgandi.
Mavzuga doir: Kobul Beruniyga bag‘ishlangan anjumangan mezbonlik qildi
Izoh (0)