Amerikalik tadbirkor, Adobe asoschilaridan biri Charlz Geshke 16-aprel kuni 81 yoshida vafot etdi. Bu haqda kompaniya saytida xabar qilindi. O‘lim sababiga aniqlik kiritilmagan.
“Uning o‘limi Adobe kompaniyasi va texnologiya sanoati uchun katta yo‘qotish bo‘ldi”, — deyiladi kompaniya bosh direktori Shantanu Narayenning xodimlarga yo‘llagan xatida. Uning so‘zlariga ko‘ra, Geshke “ijodkorlik va odamlar o‘rtasidagi muloqotni tubdan o‘zgartirgan” dasturiy ta’minotni ishlab chiqdi.
“U mashhur tadbirkor, AQShdagi va dunyodagi eng yirik kompaniyalardan birining asoschisi edi va bundan judayam faxrlanardi, bu uning hayotidagi eng katta yutug‘i edi”, — deb intervyu berdi marhumning 78 yoshli bevasi Nensi Geshke The Mercuury News nashriga. Lekin tadbirkor asosiy vaqtini oilasiga sarflaganini ham qo‘shimcha qildi Nensi.
Charlz Geshke 1939-yilning 11-sentabr kuni Ogayo shtatining Klivlend shtatida tug‘ilgan. 1972-yilda Pittsburgdagi Karnegi Mellon universitetida informatika bo‘yicha doktorlik darajasini olgan. Shundan keyin Palo-Alto shahridagi Xerox ilmiy-tadqiqot markazida ishlay boshlagan. Geshke u yerda Jon Uornok bilan tanishgan va ular 1982-yilda Xerox’dan ketib, Adobe’ga asos solgan.
Geshke va Uornokning birinchi ishlanmalaridan biri PostScript sahifani tavsiflash tili edi. Shuningdek, u Portable Document Format (PDF) dasturining ham asoschisi hisoblanadi.
Geshke 1986-yildan 1994-yilgacha Adobe’ning bosh amaliyot direktori, 1989-yildan 2000-yilgacha kompaniya prezidenti lavozimida faoliyat yuritgan. 2009-yilda AQShning sobiq prezidenti Barak Obama Geshke va Uornokni Texnologiyalar va innovatsiyalar bo‘yicha milliy medal bilan taqdirlagan.
Avvalroq iqtisodiyot bo‘yicha 1999-yilgi Nobel mukofoti laureati, kanadalik olim Robert Mandell 88 yoshida Italiyada vafot etgani haqida xabar berilgandi.
Izoh (0)