Америкалик тадбиркор, Adobe асосчиларидан бири Чарльз Гешке 16 апрель куни 81 ёшида вафот этди. Бу ҳақда компания сайтида хабар қилинди. Ўлим сабабига аниқлик киритилмаган.
«Унинг ўлими Adobe компанияси ва технология саноати учун катта йўқотиш бўлди», — дейилади компания бош директори Шантану Нараеннинг ходимларга йўллаган хатида. Унинг сўзларига кўра, Гешке «ижодкорлик ва одамлар ўртасидаги мулоқотни тубдан ўзгартирган» дастурий таъминотни ишлаб чиқди.
«У машҳур тадбиркор, АҚШдаги ва дунёдаги энг йирик компаниялардан бирининг асосчиси эди ва бундан жудаям фахрланарди, бу унинг ҳаётидаги энг катта ютуғи эди», — деб интервью берди марҳумнинг 78 ёшли беваси Нэнси Гешке The Mercuury News нашрига. Лекин тадбиркор асосий вақтини оиласига сарфлаганини ҳам қўшимча қилди Нэнси.
Чарльз Гешке 1939 йилнинг 11 сентябрь куни Огайо штатининг Кливленд штатида туғилган. 1972 йилда Питтсбургдаги Карнеги Меллон университетида информатика бўйича докторлик даражасини олган. Шундан кейин Пало-Алто шаҳридаги Xerox илмий-тадқиқот марказида ишлай бошлаган. Гешке у ерда Жон Уорнок билан танишган ва улар 1982 йилда Xerox’дан кетиб, Adobe’га асос солган.
Гешке ва Уорнокнинг биринчи ишланмаларидан бири PostScript саҳифани тавсифлаш тили эди. Шунингдек, у Portable Document Format (PDF) дастурининг ҳам асосчиси ҳисобланади.
Гешке 1986 йилдан 1994 йилгача Adobe’нинг бош амалиёт директори, 1989 йилдан 2000 йилгача компания президенти лавозимида фаолият юритган. 2009 йилда АҚШнинг собиқ президенти Барак Обама Гешке ва Уорнокни Технологиялар ва инновациялар бўйича миллий медал билан тақдирлаган.
Аввалроқ иқтисодиёт бўйича 1999 йилги Нобель мукофоти лауреати, канадалик олим Роберт Манделл 88 ёшида Италияда вафот этгани ҳақида хабар берилганди.
Изоҳ (0)